940920｜余子明今年初中風左邊身暫時癱瘓：我會努力康復

78歲嘅余子明前年拍畢劇集《踩過界II》就離開咗效力逾40年嘅TVB，不過佢就未有退休，拍攝ViuTV新劇《940920》。劇集喺噚日終於首播，佢喺劇中飾演林楚凝（蔡思韵飾）患有失智症嘅爺爺「秋叔」。有報道指余子明喺今年一月中喺家中跌倒，送院後被診斷因缺血性中風，左邊身暫時癱瘓。

較早前余子明接受傳媒訪問，當時佢指比起拍TVB劇集，拍ViuTV劇集唔會太辛苦，又提到當初不甘被TVB「一年一騷合約僅包薪$6800」綁死，自言因此心淡而拒簽離開，佢仲話拍攝《940920》時每次都有專車接送又唔使捱更抵夜，從來未試過拍劇咁嘆。

喺今年一月，余子明喺家中跌倒，並經醫生診斷後證實中風，左邊身暫時癱瘓。佢兒子Elvin喺接受傳媒訪問時話爸爸余子明由屋企人照顧，現時康復進展良好，仲話佢有做物理治療同埋針灸，而家可以自己刷牙洗面同食嘢。另外，Elvin仲應劇組要求為爸爸開設IG帳戶，喺今日仲上載一張余子明坐喺大廳，單手拎住報紙嘅近照，並代爸爸轉達話：「多謝大家嘅留言鼓勵，我會努力康復，希望快啲好翻再拍劇俾大家睇。」

之後，唔少網民都紛紛留言打氣，例如「子明叔加油 祝福您早日康復 離開了不懂珍惜您的，就更加要好好珍惜自己」、「早日康復，加油」、「加油！早日康復，好鍾意睇你嘅演出」、「楚凝爺爺，祝你早日康復，健康平安，942920，好好睇，你做得好好。繼續支持」、「子明哥既演出真係好出色，希望你快d好返，再繼續拍多d好劇俾我地睇」及「子明叔好叻吖，好精神，好番要享受生活吖」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！