雅虎香港新聞 超重男減170磅變爆肌男 照食pizza一樣瘦？
好快就秋天，你嘅夏日美好身段大計……算吧啦。 秋冬時份食食食，想瘦？都得嘅。 美國加州有位超重男Anthony，試過體重去到170公斤，因為眼見家人患上糖尿病，於是開始減重計劃，仲用幾年時間將身型雕琢成鋼條身材。運動一定有啦，但係咪餐餐白烚？ 唔駛喎。Anthony試過各式減肥飲食法，但係效果有限，有日忽然諗到，「食幾多」緊要過「食咗乜」。簡單講，佢計過如果要一星期減一磅，以體重計每日可以進食2400卡路里。而Anthony食嘢之前會計好食物熱量，即使係pizza、炸雞、快餐乜都食得，總之每日唔超過2400卡路里就得。 佢仲話，如果唔知嗰樣嘢有幾多熱量，索性唔食。
就係咁計計計，Anthony嗰半年就算無運動，都瘦咗30公斤。之後佢見身體鬆泡泡，就開始做運動，做gym修線條，到而家都係一星期操5日。 結果佢減咗成80公斤（約176磅），差唔多減走一個成年男性咁多！ Anthony話減肥係持久戰，所以有時都會一星期搵一日放縱咁食，又或者係斷食，減低時時想亂食嘢嘅慾望。佢而家仲做埋私人教練添。 其實有好多app可以check食物熱量，甚至scan barcode就得！唔想戒口嘅，可能就要動動腦筋計好數先食啦。原文傳送門【相關搜尋】減肥為何總是失敗?
