做到「滑晒啞」了嗎？

傳說……「返工就係咁架啦！」而甚麼叫「就係咁」？返工一定「就係咁」嗎？所謂「做到滑晒啞」，與工作年資並沒有必然關係。有些人做了數十年人，仍然「火氣十足」，做起事來勇往直前，當仁不讓；有些才投身職場和社會一兩年，便彷彿返埋下一世的工，無論做甚麼都像行屍走肉，就係咁架啦。


滑晒啞8大徵兆
1/ 藐工作「咪又係咁」
HR招聘時，一般會挑選熟悉有關工作範疇的求職者。經驗老到固然是一種職場優勢，然而太熟悉卻可能反而「累事」。有打工仔一味藐「咪又係咁」、「咪又係呢啲」，熟手到瞌埋眼都可以運作，鬆懈好易出事！

2/ 覺得同事很「低b」
總不明白，為甚麼自己做起來易如反掌的事，同事卻彷彿要費盡九牛二虎之力；看見他人「呢咁hea」，在眼火爆的同時，又有點心涼，暗忖︰「一定係咁咁咁做啦，咁都唔識！」

3/ 甚麼都係係係好好好哦哦哦okok
係係係好好好哦哦哦okok並不意味某某易話為、好相處，而是已經「謝晒皮」。工作有火的人，往往有自己的想法，姑勿論正確或合理與否，那怕是無謂的堅持，還是無人明的執著，總之有種傲骨。

4/ 有糧出甚麼都肯做
明明覺得事情不對勁，但為了份糧，只求「done」了結件事，上級說甚麼就做甚麼，並催眠自己「當被鬼砸」。

5/ 覺得與老闆、上司反面亦無所謂
俗語就是「一副唔想撈嘅樣子」，因為已經不能從工作中獲得所需的滿足感和成就感；不過基於「返工邊度都一樣」的美麗誤會，就求其保持「友好關係」，唯唯諾諾，出賣靈魂笑笑笑。

6/ 為放假而返工
喜歡放假不是罪過，人人都喜歡自由自在做自己喜歡的事。然而，放假放極都嫌不夠，每朝一起身就眼瞓，逢星期日晚就望明天醒來就到星期五，就要「睇路」了。

7/ 麻木
被檢討，無感覺；被照肺，無感覺；被當眾奚落，無感覺；就連獲得嘉許，亦毫無感覺……不是「滑晒啞」還可以是甚麼？熱愛工作當然最好，即使討厭返工亦低處未算低，至少是一個「立場」或「意願」；最怕是既不懂得喜歡，亦不知道討厭。

8/ click入此文
熱愛工作的話，好地地無理由無端端純粹因為啱啱遇著剛剛click進來，然後細閱每個徵兆，盤算到底有沒有被說中。

一句講晒︰世間上最令人沮喪的，是做著以為夢寐以求的事、得到曾經追到天涯海角的成就，卻已經沒有感覺。工作和人生之所以有趣，因為有期待有忐忑有偏差有棱角，偶爾迷失然後找出難分對錯的所謂方向。做到滑晒啞而覺得疲累，就換件零件——換份工也好，換個心情也罷，重新上路。

PS︰感謝讀者來信，讓我感受到返工多好！

CTgoodjobs（http://www.ctgoodjobs.hk）