Cherry為Saving婚前不辭而別 唐詩詠：有一種愛是放手

【星島日報報道】無綫電視劇《不懂撒嬌的女人》講到唐詩詠飾演的凌禹勤（Cherry），與王浩信飾演的程日暉已去到談婚論嫁階段後，昨晚播出一集又講到兩人愈來愈幸福甜蜜，Saving更彈結他與Cherry合唱《陪着你走》，令Cherry感動爆喊，情到濃時更捧起Saving塊面連環咀，唔少觀眾都被呢一幕為之感動。不過，原來Cherry係因為佢打算之後不辭而別而喊！ Cherry留低錄音比Saving，話「如果我無能力將你變得更好，我應該比你自由，做你想做嘅事」，又話知道結婚對Saving嚟講，壓力好大，多謝佢一直努力嘗試，又知道佢一直無放棄過創業，相信佢一定可以做到。結果Saving一路聽錄音一路爆喊，唔少觀眾睇完呢一幕，都上網留言話好心酸，睇到一齊喊！ 劇集播出之後，詩詠都有喺facebook出post，話呢一場戲係佢最喜歡，「那一刻內心是感動、激動、痛苦、傷心難過，卻只有自己知道，可能沒有人明白cherry的選擇，我卻明白，當你明白甚麼是愛，你可以為他做任何事情，只希望他可以更好，而痛苦的是，我不是那個可以令他更好的人。」唔少網民都留言，有人問「點解你走咗去呀？？？」詩詠就回覆：「有一種愛是放手」。

睇更多