Dear Jane紅館騷險象環生 Tim遭兩男 殺上台突襲

樂隊Dear Jane舉行紅館演唱會，首場已驚險頻生，先有狂迷衝上台嚇窒主音Tim，再有結他手Howie險中「頭獎」，連Jackal都求婚失敗，而最開心的是嘉賓歌手AGA，上到台即大叫感覺夢幻。

Dear Jane為賀入行15周年，假紅館舉行5場《Dear Jane Pendulum Tour 2021》，前晚首場吸引高舉「老公」Fans牌的Tim老婆楊洛婷、曹敏莉、曾若華、陳煒及男友等捧場。Dear Jane甫開騷即連唱兩首快歌炒熱氣氛，再與歌迷大合唱《不許你注定一人》，4位成員齊聲表示綵排時發現舞台好大，Tim大爆跟隊友輸賭，每次企錯位就罰款20元。

首次挑戰4面台，4子興奮走勻每個角落，期間有2名男Fans跨欄衝上台欲跟Tim自拍，其中一人更掂到Tim的膊頭，令正彈結他的Tim嚇一跳，工作人員隨即拉不速之客返回觀眾席。Tim定神後唱出兒歌界神曲《Let it Go》，又跟愛女Tanya說：「唱畀我一生人最愛嘅女人，我會錫佢！」其後演唱《未開始已經結束》時，會場的巨型六角吊台從天而降，結他手Howie險中「頭獎」，於台中間的Nice更作「走佬」狀，Tim即幽默說：「真係爭啲未開始已經結束。」

AGA叨光感受4面台掌聲

去年因疫情關係取消處女紅館騷的AGA，以嘉賓身份現身合唱，當4子落台後，她雀躍地說：「我第一次踩4面台，頭先喺後台已經好High，上嚟見到大家覺得好夢幻，感受到4面台嘅歡呼聲真係好正！」