《Do姐有問題》盤點百變稱呼鄭裕玲究竟有幾多個花名？點解叫DoDo姐?

Cosmopolitan.com.hk

更新日期： 2018年3月14日下午11:00

《Do姐有問題》第2輯正式開播，Do姐鄭裕玲與農夫的陸永、C君再一次合體，一齊做節目，發放笑彈！「兩隻嘢」最鍾意「玩」Do姐個名，而其實Do姐又真係有好多個花名，都係嗰句，人緣好先會俾人安咁多個花名啫！親民的Do姐，保持威嚴得黎，又開得玩笑，毫無架子，同後輩完全無代溝，三人互動極有默契。

別誤會Do姐的英文名是DoDo，原來這只是小時候暱稱。細個時，Do姐屋企鬧鐘會發出「嘟嘟」聲響，小朋友最喜愛模仿聲音，小Do姐也跟著「嘟嘟、嘟嘟」地叫，自此家人便叫她作「DoDo」。

長大後，加入演藝圈，「DoDo」個名又響又易記，所以大眾也叫她DoDo，隨住事業愈黎愈有成績，地位愈黎愈高，暱稱也要升格變做「Do姐」。

後生一輩同網民就鍾意叫Do姐做Did Did姐，皆因2015年播出的《Do姐去Shopping》，Do姐同黃翠如、農夫去全巴黎最大的古董市場尋寶，其中有間珠寶店除了售賣不少手工精細的首飾外，還展出了一些30、40年代明星佩帶過的珠寶。C君見狀，就話Do姐隨便戴一個，之後店主就可以向客人介紹：這是DoDo帶過的。豈料Do姐反擊：「DoDo你叫架咩？」，陸永在旁亦教訓C君，不可以直呼DoDo，要叫「Did Did」至岩，因為「Do Did Done」，DoDo的過去式要叫DidDid，突破盲腸，笑到觀眾碌地。「Did Did姐」也因此命名。

上一輯《Do姐有問題》，農夫每集都狂搞爛Gag，甚至每集介紹Do姐出場時，都「冇大冇細」用鄭裕玲名字食字起花名，連Do姐都笑埋一份！
最令人印象深刻的包括，全新主題樂園「鄭裕Land」、美食「鄭裕響玲」、電影「鄭裕兇玲」、職業「鄭裕玲媒」、健身「鄭裕啞玲」、動漫「鄭裕綾波麗」、特工「鄭裕玲玲七」、神婆「鄭裕顯玲」，笑位不斷。而陸永表示想飲Do姐調製的「Do屎咖啡」，更是爆笑。

Do姐就讀英文教會中學德望學校，成績優異，英文了得，點可以冇個英文名傍下身。話說DoDo只是兒時暱稱，Do姐真正的英文名叫Carol，襯唔襯佢先？讀書時期，Do姐視美國華裔名記者宗毓華(Connie Chung)為偶像，曾夢想當新聞女主播，有諗過往美國讀新聞，可惜家庭狀況不容許。1975年，考入當時新成立的電視台佳藝電視藝員訓練班而入行。

Do姐貴為無綫電視四大「鎮台之寶」之一，是殿堂級及實力派演員、金牌司儀、電視、電台節目主持人，集雙料影后、視后於一身。1983年憑電影《花城》，獲頒香港電影金像獎最佳新人獎、1991年憑《表姐，你好嘢》獲頒香港電影金像獎最佳女主角，參演的作品部部叫好叫座。適逢當時香港電影發展蓬勃，在80-90年代，Do姐成為搶手女演員，片約浪接浪，高峰時期曾創下一天內趕九組戲的紀錄，所以有「鄭九組」之稱，見證當年電影黃金歲月，以及Do姐的超強人氣。

娛樂圈有不少閨蜜團，Do姐也有個「至八會」，亦是會中的「班長」。「至八會」集合了汪明荃、曾華倩、林建明、寇鴻萍、朱慧珊、鍾慧冰、江欣燕、毛舜筠等，雖然各有各忙，但友誼維持多年不變。年初，她們就去了鼎爺私房菜搞聚會，Do姐爆料係阿姐請食飯，留言：「同這班起碼4年沒有一起聚會的美女們聚在一起，多謝阿姐！」