ERROR與《老夫子》神相似 網民提議ViuTV開拍處境劇與《愛·回家》對撼

·3 分鐘文章
ERROR
ERROR

組合ERROR成員郭嘉駿(193)近期因敢言作風受到關注,其直率性格獲網友激讚,人氣急升,Instagram追蹤人數更超越MIRROR人氣王姜濤,成為MIRROR同ERROR成員中擁有最多人追蹤嘅一位。同時193亦帶挈有份做主持嘅節目《花姐ERROR遊》及《ERROR自救TV》等重新登上ViuTV十大最多人觀看節目榜。ERROR即將推出新節目《ERROR自肥企画》,預告一出已經令唔少網民大呼期待,近日連登討論區有網民出PO提議ViuTV與《老夫子》作者王澤合作,並搵嚟ERROR成員主演,阿Dee飾演老夫子、肥仔飾演大番薯及193飾演秦先生,而老趙就暫缺,因為要睇保錡造化,仲話將漫畫可以拍成處境劇,與無綫嘅《愛·回家之開心速遞》對撼。

呢個PO成功引起網民熱烈討論,唔少網民都紛紛留言表示支持,例如:「真心好吸引 成本又低 簡直係令人以為error係由老夫子做原形諗出黎咁match」、「我要睇Error拍老夫子」、「佢拍我一定集集睇 平時冇睇開電視都咁話」、「又幾有綽頭wo」、「扮老夫子呢個IDEA真係唔錯」、「大番薯同肥仔直頭係一樣」、「呢個諗頭又幾X過癮」及「呢三個又幾似」等等。另外,亦有網民提議搵ERROR開拍《Harry Potter》和《西遊記》,193飾演師傅、 肥仔飾演豬八戒、阿Dee飾演沙僧、而保錡就飾演孫悟空。

連登討論區嘅IG亦有因此出PO,除咗吸引唔少網民留言之外,連阿Dee都有留言話:「同我大大力推!」阿Dee喺接受傳媒訪問時就話冇諗過《老夫子》係咁適合佢哋,網民嘅改圖成功令到佢笑同埋想像到ERROR去扮會幾搞笑,仲話相信ERROR非常樂意去做呢件事。《老夫子》仲有一個非常重要嘅角色,個個就係陳小姐,網民們就提議蔡宛珊(Sarika)、沈殷怡(Shirley)同埋經理人花姐(黃慧君),而阿Dee就話佢個腦暫時得Shirley一個人選,因為覺得佢幾符合,同埋劇集係需要有靚女擔當。至於花姐飾演陳小姐,阿Dee就話唔好搞,叫花姐拍劇最後受難嘅都係ERROR四子,花姐都係專心做經理人同籌備節目。另外,阿Dee仲話會主動向公司提議,不過就好睇原作者(王澤)嘅睇法,同埋公司會唔會願意買版權。對於網民提議以處境劇形式與《愛·回家之開心速遞》對撼,阿Dee就話對撼只係其次,做創作最緊要嘅係有訊息。

網民創意改圖
網民創意改圖
ERROR
ERROR
ERROR
ERROR
ERROR
ERROR

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!