高質日韓Fine Dining推介 釜山風味精緻韓國料理、中環鐵板燒omakase

食Fine Dining都係食西式嘅多，但其實仲有好多唔同菜式嘅Fine Dining選擇㗎～上次介紹咗東南亞地區菜式嘅Fine Dining餐廳畀大家，今次到大家最愛嘅日本菜同韓國菜，相信一定有驚喜！

新派高級日式料理 ODDS

型格時尚嘅高級日式料理餐廳，供應鐵板燒、壽司及燒鳥等，仲設有酒吧區，各種酒類應有盡有。最受歡迎就係佢哋嘅廚師發辦Omakase「料理長發辦一日前」，前菜鯛魚白子醬油燒外焦內滑，比生白子多一層香氣。法國藍龍蝦蒸蛋都好出色，龍蝦新鮮彈牙，鮮味滲晒入蛋度。重點係呢份佐賀和牛薄燒，燒得好香口，油脂豐富，包住蔥同蒜就再惹味啲。

矜貴韓式家庭風味 OOULI

平時食韓國菜接觸都係炒年糕、紫菜包飯同烤肉，精緻啲嘅韓國料理就少啲見喇，仲要有家庭風味㗎～餐廳由韓國釜山人Jim Kim開設，所有新鮮海鮮同食材均由韓國直送，最重要嘅大米更由韓國農田直送香港，保留最原始風味。Tasting Menu內推介烤韓國頂級1++ 和牛，同日本和牛唔同嘅係油脂冇咁多，但肉質軟腍而且牛味超香濃！韓式參雞湯燴飯都唔錯，用韓式參雞湯整成嘅risotto，飯煙韌有咬口吸收晒參雞湯嘅精華。

米芝蓮三星創新韓國餐廳 Mosu Hong Kong

位於M+嘅新派韓國菜，呢個夏季推出咗全新嘅九道菜嚐味菜單，道道菜都令人印象深刻。如前菜精雕蘑菇撻，將白洋菇萃取及微微燒焦嘅忌廉注入經廚師精雕嘅新鮮白洋菇內，放上即焗嘅杏仁撻上，清新爽甜。風乾韓牛配夏日時蔬係用醋將風乾製成嘅韓牛西冷薄片、新鮮蕃茄及新鮮青瓜醃製，放上烤至焦脆嘅麵包上，鹹香又酸酸地，平衡得好好。甜品都好精彩，昆布芝士蛋糕新奇而恰到好處，昆布淡淡嘅香氣令蛋糕層次更豐富。

酒店級日式居酒屋 The Aubrey

酒店內嘅日式居酒屋，裝修走英倫風，環境高貴典雅。呢個Three Layer Bento Set好受歡迎，用木盒盛載，擺盤精緻啱晒打卡！食物方面可以自選主菜，如有A4 Kagoshima Wagyu Sando，麵包外層香脆，和牛油脂豐富充滿牛香，入口即溶呀。另外便當仲有埋漬物、薯仔沙律、蟹餅、壽司、麵豉湯同埋茶碗蒸，食到捧住個肚走！

文: Yanica