MIRROR年度排名︳第12位︰Frankie 陳瑞輝 未被觀眾看見的努力

今年作品︰

主持－ 囝囝囡囡730 ／ MIRROR EURO 鬥Goal Fun

有排名就有先後，今年MIRROR勢如破竹，但論作品論發展潛力，皮皮係比較淡靜嘅一位。當然可以話佢拍咗劇（《IT狗》）下年先出街嘛。

花姐講過，佢同Frankie都唔想只係聽到「皮皮真係好靚仔」嘅讚美說話。咁但係睇《調教你MIRROR》聽到同樣由花姐口中所講，學演戲但係學啲唔學啲，明知唱歌搞唔掂於是學結他，結果又半途而廢，咁就明白盛讚「皮皮真係好靚仔」嘅原因......

不過，喺花姐講出Frankie「好懶散」之前，我聽到好重要嘅一句「我同佢啲兄弟都（為Frankie)好𤷪𤺧」。即係話，圍內人都會著緊Frankie。

一隊籃球隊入面，有種球員叫Glue Guy，唔一定最好波，但會同隊友提出意見，凝聚成隊人。MIRROR呢隊波，就有Frankie飾演呢個角色。

梁祖堯喺《調教你MIRROR》出街之後提到「皮皮係一個唔鍾意競爭嘅人，而佢亦都唔係一個會好主動喺大圍表達佢睇法嘅人；但絕對唔代表佢係一個冇要求、冇睇法嘅人，而佢嘅睇法往往都會私下同大家分享」。跟開MIRROR動態嘅都知成隊人私下分成兩邊，而Frankie就喺拍《調教你MIRROR》兩邊破冰之際，嘗試將2班人拉返埋。呢個位，唔易做，亦冇掌聲。觀眾睇唔到皮皮有幾多幕前演出，但係「誰又能鑑定你的醜惡與美好」先？

至於「皮皮真係好靚仔」係咪局限咗佢嘅發展？我覺得Frankie可以參考吓張智霖，Chilam最大賣點係靚仔、入屋、有觀眾緣，結果喺呢行做咗30年。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！