MIRROR成員Frankie女友留言感謝fans 皮皮公然放閃 粉絲因一事不滿阿嫂 （有相）

MIRROR成員Frankie陳瑞輝（皮皮）入行時已公開有拍拖多年女友，但戀情最終告終。去年平安夜皮皮突然喺IG公開有新戀情，受訪時透露過女友係圈外人，但身份始終成謎。偶像拍拖未必個個受落，不過唔少「皮寶寶」(Frankie fans稱呼）認為Frankie拍拖後性格有正面改變，似乎幾受落。

早前有「皮寶寶」轉貼Frankie社交平台嘅相，並發文盛讚「阿嫂」識影相，影得Frankie好好睇。而一個以Christy為用戶名嘅帳戶就留言回覆話「多謝皮寶寶嘅厚愛 我會影多啲比大家睇同埋爭取多啲福利」，相信係釣到皮皮女友現身！而Frankie都有向女友留言放閃「難得迫到你出嚟講多謝 我都要多謝你！你影啲相好靚」。

不過FANS對於「皮嫂」自動浮上水面反應不一，有人認為「好sweet」、「好事近」，亦有網民認為太高調唔係好事，並以隊友Stanley(邱士縉）同Lokman（楊樂文）為例，指兩人都有公開戀情，但係另一半並冇咁樣「宣示主權」。而有fans就聲稱，早前MIRROR 各成員嘅專屬fans見面活動上，「皮嫂」Christy現身男友Frankie嗰場，更上台參與同皮皮互動嘅環節。fans認為Christy平時都會見到Frankie，唔應該霸佔上台見皮皮嘅名額喎。Fans出post表達不滿，話「唔係介意佢(Frankie)拍拖，而係介意佢(Christy)喺fans meeting插旗。Fans meeting同睇演唱會唔同，Fans meeting係啲fans想同偶像互動嘅地方，完全唔except正室會出現，仲要扮fans上台互動」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！