MIRROR成員年度排名︳冠軍︰姜濤 鞏固實力 邁向退休之路?

·2 分鐘文章
姜濤
姜濤

今年作品︰

單曲 - Master Class、Dear My Friend, 、鏡中鏡(未派台)、特務肥姜2.0(與ERROR肥仔合唱)、愛不作聲(與Anson Lo合唱)

劇集 - 超感應學園 / 太平紋身店

姜濤
姜濤

今年1月1日係MIRROR值得紀念嘅日子。叱咤樂壇流行榜頒獎典禮上,MIRROR奪得組合銅獎,姜濤贏得全港樂迷投票嘅「我最喜愛的男歌手」及「我最喜愛的歌曲」大獎。由於「我最喜愛」係投票得出,好多人突然先知,原來MIRROR真係紅,姜濤真係多fans。自此,MIRROR就成為品牌寵兒引發全民追星,突然所有人都討論呢12個人。可以話,係由姜濤打開咗呢道缺口。

論表現,今年姜濤喺音樂上開始摸出自己曲風,唔再係《一天多一點》同《一號種籽》嘅多甜冧歌,Master Class 係姜B經保錡介紹而搵新晉唱作人湯令山(Gareth Tong)創作,再由落筆必中嘅Wyman填詞,用易入口嘅手法為作品注入新音樂風格,聰明。聽埋喺MIRROR 6子音樂會上首唱嘅《鏡中鏡》,更覺姜B冇違背「以作品說話」嘅豪言。如果姜B係想30歲前做一首滿意嘅作品然後退休,咁佢行緊一條十分正確嘅退休之路。

姜濤深夜發文講心事 「對身邊的人感到懷疑」
姜濤深夜發文講心事 「對身邊的人感到懷疑」

係噃,其實姜濤今年最好睇係喺唔同場合展示嘅智慧,6子音樂會上唱哥哥梅姐致敬,對應今期《梅艷芳》大熱;頭先提過叱咤頒獎台上「以作品說話」之外,Chill Club頒獎禮嘅一句「相信我哋呢班後生仔、香港嘅歌手,我相信可以再次成為亞洲第一」,放諸於社會同樂壇同樣合適。姜濤今年最好睇嘅一刻,梗係《考有Feel》打一下眼色就交代到「食奶咀」嗰下啦。

雖然今年已經有一半隊友單飛,甚至人氣一度被Anson Lo (盧瀚霆)(仲有兄弟團ERROR嘅193)過頭,但論整體作品水準同全面性,姜濤依然係交出最高質素嘅一位。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能