MIRROR演唱會︳花姐老公IG發文「感覺將要失去」 網民擔心MIRROR前景

MIRROR演唱會上星期四第4場演出發生屏幕墮下事故，令舞者阿Mo（李啟言）、張梓峯（阿峯）及羅德智(Zizac）受傷，其中阿Mo傷重危殆。一共12場嘅演唱會，其餘8場即時取消，MIRROR多日來未有現身，至尋日下晝先至返九龍灣公司辦公室開會。

事故震撼全港，MIRROR前途未卜，MIRROR經理人花姐（黃慧君）老公尋日喺社交平台發限時動態，寫上「努力建立、苦心經營，一件事物，如同親生兒子，感覺將要失去，在淌血。」，另外仲以選擇題問網友「旁觀的您，感受如何？」，而三個答案分別係「善用能力 – 盡力保護」、「當事人責任 – 與我無關」和「無不散之筵席 – 順其自然」。言詞令人聯想到MIRROR甚至係花姐嘅前途。

連日來不斷有傳言話MIRROR成員同ViuTV（後轉至同系製作公司Makerville）5年合約明年屆滿，令外界關注MIRROR前程，但亦有指MIRROR 仲有5年生約，Makerville有優先權行使。亦有網台主持爆料指Makerville CEO魯庭暉將會辭職，但Makerville旋即否認。至於花姐過去幾日兩度去到警署就事故錄口供。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！