MIRROR私追算小兒科 瘋狂fans入宿舍偷底褲 落毒 斬到偶像毀容！

12人男團MIRROR人氣大盛，早前MIRROR入梅窩拍節目《調教你MIRROR》，因為有一批fans聞風而至，影響拍攝進度，搞到姜濤要出聲教訓。據講有fans好唔開心，而姜B事後都有喺通訊群組解畫。

因為呢件事，我地認識到「私追」呢個字，即係一班瘋狂追星族，一早收到風偶像去咗邊，甚至有人連偶像住邊都知，仲上門拍門！狂迷唔係新鮮事，好在MIRROR fans尚算理智。喺日韓等地，狂迷甚至斬偶像！

富田真由被斬毀容

2016年，日本女藝人富田真由喺東京小金井市出席活動前，被一名瘋狂男fans用刀襲擊。富田身上出現34處刀傷，情況危殆，心肺功能一度停頓，昏迷2個禮拜後甦醒。不過因為傷及面部而毀容，星途曳然而止。日本警方調查報告指出，疑兇岩埼友宏因為向富田送禮兼拎電話號碼被拒而出手，法庭判佢罪名成立，入獄14年半。

東方神起允浩被落毒

狂迷分好多種，有一類叫「黑粉」或者anti，對偶像極其反感，會做出瘋狂行為，但係本身可能係因愛成恨。2006年韓國男團東方神起成員允浩喺錄影電視節目休息期間，飲咗「加料」飲品感到不適送院。事後一名廿幾歲女子各警方自首，承認扮fans送加咗萬能膠嘅飲品到電視台，並自稱係討厭允浩而犯案。不過當時有報導話，行兇女子經常喺東方神起嘅活動出現，可能係由fans變成黑粉都唔定。

EXO D.O.被偷底褲

好多偶像團體會住喺宿舍方便照應，2014年韓國就發生過私生飯（追蹤偶像私生活粉絲）潛入偶像宿舍事件，受害人係男團EXO嘅D.O，而佢唔見嘅「財物」係一條著過嘅底褲！有fans喺網上自爆潛入宿舍，聲稱偷走D.O.嘅底底，並出價10萬韓圜（約696港元）兜售。「賊人」仲話上面有D.O.嘅體毛，歡迎大家驗DNA，又揚言會再出手偷其他成員嘅底底！

Wanna One fans追星追上飛機 搞到delay

為咗睇星，有fans book酒店務求可以貼身追蹤，甚至買機票上機，只為同偶像影張相。之但係咁做足以阻住地球轉！2018年底，韓國男團WANNA ONE去到香港參加MAMA頒獎禮，活動完結第二日坐飛機返韓國。有2名內地以及1名本港fans，買咗WANNA ONE乘搭班機嘅機票，但係登機只為搵偶像影相，「事成」之後要求落機並退款。基於安全考慮及法例，全機乘客要再落機接受安檢，搞到班機延誤1個鐘。更過份嘅係，由於呢班fans買嘅貴價機票可以退款，佢地其實一毫子都唔駛俾，但係航空公司就要將額外安檢開支賠俾香港機場。因此航空公司要改例，以免再有同類事件。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！