《十月初五》勁收 愛妻號Chilam冧拖靚靚慶祝

張智霖（Chilam）和袁詠儀（靚靚）結婚十四年，連囝囝張慕童（魔童）早前也九歲了，不過相處至今依然sweet到漏！ 近日Chilam雖然忙於四出宣傳電影版《十月初五的月光》，以及下年一月在廣州舉行的個唱，但不用開工的時候，他仍會跟老婆靚靚儼如糖黐豆。如日前，Chilam相約公司老闆蕭定一到中環午膳，慶祝《十月初五》在中港澳大收逾五千萬人仔票房，亦孖住靚靚一齊，更毫無避忌十指緊扣拖到實，搞到阿一即時變咗電燈膽。 採訪、撰文☆娛樂組 攝影☆陳兆康 設計☆吳俊彪 冷落老闆 電影版《十月初五的月光》於中、港、澳上映後大收旺場，至今合計有逾五千萬人民幣票房，日前午飯時間，張智霖便偕老婆袁詠儀，相約電影公司老闆蕭定一於中環置地食飯慶祝。 當日約下午一時半，三人用膳完畢後，戴着黑超的Chilam便與老婆一支箭離開餐廳，只見阿一馬上尾隨二人。由於其時商場人流甚多，Chilam跟靚靚並肩走了一段路後，便自動波拖實老婆手，即使阿一跟靚靚邊行邊傾偈，Chilam亦似乎沒有鬆開老婆手的意思。 步出置地後，阿一即由司機接載離去，而Chilam兩公婆則一直步往雪廠街，返到停泊在那裏等候他們的七人車處。整頓了一會，靚靚便從車廂拿出其Hermes手袋，跟Chilam揮手道別，獨個兒向都爹利街方向走去。行至馬路處，靚靚剛巧遇見一名手挽Hermes紙袋的女性朋友，只見二人打了個招呼後，該名女友人便不停指着靚靚的手袋傾談，如是者二人站在馬路邊吹了五分鐘水才捨得離開，靚靚便急步往都爹利街一幢商業大廈去。 送袋送樓 查實，當日靚靚與女友人之所以對那個挽着的Hermes手袋話題多多，只因那個手袋為Hermes 限量Flag皮革拼帆布的Birkin袋，價值十多萬元！而靚靚所用的那個深藍色帆布，更是極為罕有版！ 老婆出名鍾情Hermes，作為老公的Chilam便曾笑稱：「唔好提！我一聽到呢個品牌就打冷震！聽到倫敦同巴黎呢兩個地方，我就心寒！（每次到當地旅行）我老婆好似朝聖咁，每日都要先去Hermes行過先肯食早餐！連我個仔都知（媽咪愛Hermes），仲話屋企裝修要換橙色，因為媽咪鍾意。」又謂：「有高人指點，我老婆同個仔命水好，我就注定為妻兒勞碌一世！」 把口雖如是說，但實情Chilam近年自豬籠入水、晉升為億萬富豪後，對於送禮物給靚靚，幾乎是沒有上限可言。除了動輒十萬元的Hermes任她買個夠外，去年九月，Chilam更以自己和靚靚各持一半股份的「二豬有限公司」（因二人生肖皆為豬年）名義，斥資一千一百多萬，一炮過買入銅鑼灣希雲街曦巒單位。愛屋及烏，至今年五月，Chilam更為靚靚的家人，以她的名義購入北角健威花園六百多萬的單位。 男神惡搞 《十月初五》於中、港、澳票房報捷，既帶挈了Chilam下年一月於廣州舉行的個唱門票大賣，亦吸引了同樣是蕭定一旗下藝人的男神王宗堯，近日拍了個名叫《足膝好》的惡搞版短片。日前，他與有份參演的周家怡和陳詩慧，便齊齊於社交網發布「預告」，片中故事講述飾演「拮哥哥」的王宗堯跟陳詩慧所演的「紫煙」，有一段三世情緣，而「紫煙」有鋪舔膿癮，當她為「拮哥哥」洗完膝頭傷口後，便會把那些膿放入口！ 情節騎呢又無厘頭，跟《十月初五》完全零關係，不過海報照片卻跟到足來惡搞，原裝是「初哥哥」背着「君好」的畫面，卻變成由陳詩慧背起王宗堯。「我本身都好大力，孭起佢H時候冇腳震㗎！」陳詩慧笑着說。 至於這次惡搞，原來只是一時興起之作，王宗堯說：「早排我同陳詩慧佢哋去橫店探周家怡班，有日家怡唔使開工，大家就好無厘頭咁諗咗呢個故仔出嚟！我哋諗住幫陳詩慧做宣傳，因為佢就嚟出碟，而且我哋亦有意捧佢做女笑匠，打破佢一直以嚟自以為靚女H形象囉！哈哈哈哈！」唔知老闆阿一睇完，好嬲定好笑呢？ 見商場途人甚多，Chilam即拖到靚靚實一實，冧爆的靚靚則繼續跟阿一邊行邊傾。 日前戴着黑超的張智霖，和袁詠儀跟蕭定一於中環置地午膳後，即急急腳偕老婆離開餐廳，無意間冷落了老闆阿一。 跟老婆返回七人車停泊處後，二人整頓了一會，Chilam便先行離開。 送了老公上七人車，靚靚返轉頭往都爹利街方向走去。 當日靚靚所挽的Hermes，為Flag Birkin激罕深藍色限量版，價值十多萬。 靚靚出名極愛Hermes，早前連Apple Watch都唔放過，更在微博寫道：「我真的蠻喜歡橙色的。」 靚靚在街上偶遇朋友，二人吹水期間，友人不時指着靚靚手挽着的Hermes手袋。 Chilam近年大豐收，對老婆出手變得更闊綽，去年便斥資千多萬，以跟靚靚合股的公司名義，買入銅鑼灣曦巒豪宅單位，讓她有樓揸手。 電影賣座帶挈，Chilam下年一月的廣州個唱，門票也因此大賣，掀起搶飛熱。 十一月二十日於內地上畫首日，即成當日全國票房第一位！連Chilam亦在當天發了有關微博。 電影版《十月初五的月光》三地合計票房逾五千萬人仔，上周三（廿五日）眾人於旺角舉行慶功宴，「初哥哥」Chilam負責開香檳。 跟Chilam同屬蕭定一旗下的男神王宗堯，近日跟周家怡等好友拍了《十月初五》惡搞版《足膝好》，海報中陳詩慧孭起男神，畫面同原裝的（小圖）跟到足。 上周五（廿七日）晚，有份投資的太陽娛樂老闆周焯華，亦有參與報捷活動，靚靚其後更於微博上載了跟他的合照，更寫上〈祝君好〉歌詞。 《足膝好》上周於社交網發布了「預告」，片中王宗堯飾演膝蓋受傷的「拮哥哥」。 周家怡於片中既是陳詩慧的好友，又是古代中負責斬男神首的「劊子手」。 男神講明要力捧的笑匠陳詩慧，在片中是愛吮膿的女主角「紫煙」。