Regen情緒不穩瘦到得棚骨！

現年32歲、前組合HotCha成員張惠雅（Regen）早前自爆失戀瘦到變紙板人，本身有抑鬱症前科的她承認情緒不穩，自知太瘦揚言會努力增磅，對於惹來抑鬱復發及厭食症的揣測，她表示大家毋須擔心，又上載吃雞翼照「報平安」。

Regen前日在社交網上載着住粉紅色bra top照，見她瘦到皮包骨，得番84磅，面無四両肉，鎖骨位凸到可以放番梘。素顏的她有點憔悴，留下啡色心心圖案，不明所以，圈中好友Cheronna都不禁留言：「瘦到心都痛埋。」

打理食店頻撲

早前Regen亮相ViuTV的《吃掉前男友》節目，自爆拍攝前剛與細她8年的台灣男友分手，因為捨不得，曾經主動搵過對方多次，但最後竟被「封鎖」，兩人終告斷聯。10月初她在自己平台留言：「自己都知道瘦到好殘」、「失戀後終日躺於床上不吃不喝了一段時間。」又透露有脫髮問題。

被指暴瘦的Regen，昨日解釋是因為忙於打理長洲食店所致：「我有食嘢呀，食番好多嘢，因為呢排太忙，開舖啲嘢全部一個搞，所以頻頻撲撲，到時大家多啲嚟我舖頭，我就好開心o架啦。」對於有指她抑鬱症復發及患上厭食症，她說：「我10年前已經有抑鬱，抑鬱好難話會好番，依家做番嘢會睇住番自己情緒。（關唔關失戀事？）都唔太關事啦，自己情緒一向唔穩定，我會慢慢學習調節，我都知太瘦，依家準備搞埋啲嘢就衝去食飯，好餓呀！」

也曾有過暴瘦經歷的韓君婷，亦為Regen加油，並表示：「應該畀啲空間當事人，畀機會佢身邊嘅家人同朋友去關懷佢，唔好喺佢社交平台畀負面留言。」

Crystal不覺有異

Regen舊隊友張紋嘉（Crystal）透露上星期跟Regen一齊工作，她說：「佢係瘦咗，我都有關心佢，佢有講過胃口細咗，但佢心情又冇咩，唔多覺佢有情緒病。」而Crystal日前孖張敬仁為香港開電視拍攝一個介紹甜品節目，她乘機偷師學藝，最難忘一日內吃掉超過30款甜品。