TVB奧運後播國產《射鵰》黃蓉顏值被質疑 舊劇深夜重播仲吸引

巴黎奧運進入最後階段，TVB尋日宣布晚間直播提早至7點半開始，王牌劇《愛．回家之開心速遞》都要讓路。下星期奧運完結，翡翠台又會回到正常時間表並推出2套新劇。

8點半檔會播《法證先鋒6 倖存者的救贖》，主角繼續係上一輯嘅黃宗澤、蔡潔及袁偉豪，而曾經入讀TVB藝訓班一日嘅馮皓揚都會參與，飾演王敏奕嘅自閉症弟弟。總監製鍾澍佳曾經透露《法證6》一開始黃宗澤同王敏奕遇上事故而令生活出現好大變化；蔡潔喺上輯遇上連環殺手關楚耀而留下極大陰影，但關楚耀將會以另一個角色出現並與蔡潔重遇，對佢產生極大衝擊。至於袁偉豪就會有新嘅感情生活。今輯《法證》到日本取景，但最吸引嘅可能係貫連多集嘅「小丑」之謎到底會唔會解開。

而9點半檔就會播出內地劇集《金庸武俠世界：鐵血丹心》。劇集改編自金庸名著《射鵰英雄傳》，原本一共有5個單元共60集，分別為《鐵血丹心》、《東邪西毒》、《南帝北丐》、《華山論劍》及《九陰真經》，但至今只得《鐵血丹心》呢個單元喺內地播出。《金庸武俠世界：鐵血丹心》內地版共30集，但喺內地劇評網豆瓣評分得6.3，只屬不過不失。飾演郭靖嘅男主角此沙因為內地電影《封神第一部︰朝歌風雲》而走紅，更被封為「國產金城武」。但飾演黃蓉嘅包上恩，就被批評顏值比唔上之前多位演黃蓉嘅女星。

反觀深夜重播時段就幾有睇頭，因為會播2005年嘅《隨時候命》。此劇可謂近20年其中一套雷聲大雨點少嘅TVB劇。當年最大賣點係鄭伊健，係拍完一系列《古惑仔》嘅鄭伊健，難得回巢主演一套被視為係《衝上雲霄》加《烈火雄心》嘅職業劇。劇中拍檔林保怡選得恰當，唔搶戲亦幾有型，女一係當年女一咗好幾年嘅佘詩曼。再加埋上位中有新鮮感嘅鍾嘉欣、楊思琦（《人生馬戲團》？）。牌面唔錯，但收視很誠實，平均居然唔過25點，最低更只得21點，以當年（2005年）標準絕對唔OK，甚至傳過要腰斬！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！