TVB收視 ︳勁歌頒獎禮創6年新高 《堅離地愛堅離地》差過配音劇《燕雲台》

以往TVB會喺星期一公布剛過去一周節目收視，但係近年做法有變，改為隔一個禮拜先公佈。而且因為收睇節目模式改變，過去嘅收視數據只係計透過電視收睇嘅人數，而家就連網上平台都計算在內。近期TVB公布1月11至17日嘅收視，當中包括當時仲播緊第10－14集嘅《堅離地愛堅離地》以及《2020年度勁歌金曲頒獎禮》。

一月好多時都被稱為「炮灰」檔，因為呢段時間重頭劇台慶劇剛剛播完，都要搵啲小品劇「清下腸胃」；而且以往逢年近晚唔少人出外度歲或者出街食飯，收視例牌跌，倒不如出一出啲倉底貨應付下。今年就有因為黃心穎參與而被扣起3年先出街嘅 《堅離地愛堅離地》，播到第3個禮拜收視仍然持續不振，只係有21點。前2周亦只有21.2及20.2點，非常貼近20點警戒線，好在孭飛演毒男嘅張振朗表現到位，加上有黃心穎做代罪羔羊，應該唔影響張振朗同龔嘉欣嘅聲勢。

另一線黃金時段劇集《燕雲台》前周平均有22.7點收視。向來呢類內地一早播完嘅配音劇收視都會爭少少，呢個星期可以贏《堅離地》都幾出人意表，亦證明《堅離地》成績有幾麻麻。至於向來係劇集皇牌嘅《愛•回家之開心速遞》呢個星期有27.7點收視，三線劇之中最好之餘亦係全周最高收視節目，難怪網民對於早排「劉丹拎視帝」嘅消息一啲都唔意外！

《愛．回家》嘅收視比一年一度嘅《2020年度勁歌金曲頒獎禮》高出一截，勁歌頒獎禮平均直播收視15.2點，最高20.9點，TVB話有超過240萬人收睇，並且係「2015年以來最高收視的音樂頒獎典禮」。對比再前一個禮拜收視有31點嘅《萬千星輝頒獎典禮》，「勁歌」當堂被比下去，畢竟周柏豪同胡鴻鈞一齊拎最受歡迎男歌星，又真係冇陳自瑤嘅神級演技咁好睇嘅。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！