雅虎香港新聞 TVB改播《律政強人》悼念廖啟智 資深演員相繼離世 鄭伊健《雙面伊人》重播三度改期
TVB深夜重播時段可以話係另類黃金時段，即使都係播重播劇，但係觀眾都幾關注播咩劇。本來接替最近播完嘅《他來自江湖》係1999年鄭伊健主演劇集《雙面伊人》，不過因為廖啟智逝世，TVB決定抽起《雙》改播智叔主演嘅《律政強人》。而今次已經係《雙》第3次喺深夜時段被抽起。
《雙面伊人》本來係接住今年新年播完嘅《女人俱樂部》，但播出前遇著李香琴逝世，TVB改播琴姐有份嘅《溏心風暴之家好月圓》。跟住嘅農曆年檔期，重播嘅係楊千嬅同周柏豪2018年主演嘅《多功能老婆》。去到2月底都有宣傳片預告《雙面伊人》出街，喺播出前一日因為吳孟達病逝，TVB再抽起《雙》而播放《他來自江湖》。加埋今次讓路俾《律政強人》，3個月內《雙面伊人》改期3次！
《雙面伊人》自1999年首播以來只係重播過一次，卡士陣容唔弱，有鄭伊健帶埋謝天華同林曉峰2個「古惑仔」兄弟，而女主角就係當時狀態回勇嘅袁潔瑩，佢仲要一人分飾2角。故事講述鄭伊健飾演嘅姚樂天因為游艇意外爆炸而失憶，但腦裡經常泛起神秘黑衣女郎身影。後來樂天認識星探一鳴（謝天華飾），又重遇自稱係佢好兄弟嘅德信（曹永廉飾）。樂天見到德信女友林靜（袁潔瑩飾），發覺靜樣貌同黑衣女郎一模一樣，令樂天決定不惜一切搵出爆炸真相，以及靜背後秘密。
話說《雙》首播嘅時候遇著2間電視台收視大戰，TVB為咗迎戰亞視嘅《少年英雄方世玉》以及《今日睇真D》，一個月內調整黃金時段節目編排3次，本來係7點半檔嘅《雙》播完頭2集就調咗去9點3時段，再下一個禮拜又返去7點半播直至劇終。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
