TVB新主播譚詩雅首次報新聞即成熱話 曾兩度選港姐兼係郭嘉文好友

有唔少TVB新聞主播都係女神級，為網民嘅討論話題之一，近日唔少網民留意到TVB新聞部深夜及晨早時段加入咗一名靚女新血，新主播譚詩雅除咗曾兩度選港姐，更加係2015年港姐季軍兼「千億女友」郭嘉文嘅好朋友。

譚詩雅首次報新聞就引起關注，有網民將佢報新聞嘅照片截圖分享，表示：「10年無睇過電視，但今晚點都要開，望到我都好緊張，抖曬大氣。個鼻塞到癲都要聽你個句『大家好，我係譚詩雅』。」獲譚詩雅轉發並寫道：「又黎睇我唱歌又睇我first live！！不過好肥。」畢業於中大社工系嘅譚詩雅曾於2022年報名選港姐，但首輪面試後未有入圍，翌年由好朋友郭嘉文推薦再次參選港姐，郭嘉文亦與譚詩雅進行瑜伽特訓，為對方加油打氣；譚詩雅當時就有轉載二人做瑜伽嘅片段，並感激郭嘉文陪伴：「多謝一直咁支持我，由相識去到而家都陪我行咗好多路，喺我懷疑自己、好擔心嘅時候叫我畀啲自信，喺你身上學識咗攞個膽出嚟，將自己想講嘅嘢到勇敢堅定咁表達。」而譚詩雅當時亦透露為選港姐而裸辭社工工作，不過最終於第二次面試後就落選。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！