ViuTV揸fit人魯庭暉 棄蘋果高層職位回流 0經驗做電視創造MIRROR傳奇

日前有報導話，ViuTV董事及總經理魯庭暉獲母公司電訊盈科安排出任以節目及演出製作、藝人管理等業務的新公司CEO，並兼任現有職位，估計人事變動係要全力安排旗下當紅男團MIRROR日益繁重嘅工作。

ViuTV啟播5年，論收視同大台仍然爭一大截，但係節目起碼有唔少年青觀眾捧場，仲未計一手捧起MIRROR。40出頭、人稱魯暉嘅魯庭暉，原來被安排做ViuTV話事人之前，從未做過免費電視台！

基層家庭出身嘅魯庭暉，中一時入讀新會商會陳白沙紀念中學，同MIRROR隊長Lokman（楊樂文）份屬校友；中二轉到名校皇仁書院，政評人沈旭暉係佢同屆同學。魯庭暉1998年入讀中大生物系，但為咗入讀心儀嘅新聞及傳播學系，魯暉盡全力谷起成績結果得償所願，最後仲以一級榮譽畢業，後來更去到英國牛津大學讀碩士。

大學期間魯庭暉曾經報讀商台「廣播之王」訓練班，並且喺商台做過創作工作。畢業後佢加入廣告公司負責度橋，更被蘋果公司聘請做亞洲區創意總監。後來魯暉回流香港加入電盈，輾轉下調任NowTV做策略管理，2014年電盈籌備新電視台，委任魯庭暉成為董事及總經理。

同樣都係總經理，TVB嘅曾志偉縱橫娛樂圈幾十年，魯庭暉相比下資歷尚淺，幾年前佢喺訪問提到自己辦公室有7個屏幕，用嚟睇ViuTV及其他電視台節目，等自己貼近市場。曾志偉曾經笑言最有興趣參考Viu「點樣可以咁平拍節目都會有人睇」，魯暉就喺另一個訪問提到資源未必係致勝關鍵，唯有靠熱誠、創意搭救。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！