ViuTV新劇《太平紋身店》1月18日首播 姜濤角色極之重要

上年ViuTV有多套好評嘅原創劇集，例如《二月廿九》、《嘆息橋》、《暖男爸爸》及《男排女將》等等。充滿江湖味嘅《太平紋身店》成為今年首部推出嘅原創劇集，將於本月18日晚上9點半首播。劇集搵嚟周秀娜、黃德斌、吳綺莉及林德信等人主演，仲有啱啱喺《叱咤樂壇頒獎典禮2020》拎咗「我最喜愛的男歌手」嘅姜濤客串演出，睇嚟到時又會掀起追劇熱潮啦！

集犯罪、懸疑及愛情於一身嘅《太平紋身店》，以電影手法拍攝，劇情主要講述太平街本來係一個冇人管嘅神秘地方，滿佈紋身嘅神秘女子Nana（周秀娜飾）喺太平街開設隱世紋身店，佢會根據客人嘅奇幻經歷，然後幫佢哋度身訂造紋身款式，同時Nana嘅神祕身世亦會慢慢揭開。而客串嘅姜濤喺劇中飾演葉蓋天（黃德斌飾）嘅兒子葉天晴，不過出場無耐就被人殺害。姜濤嘅角色喺劇中極之重要，原因係葉蓋天因為喪子之痛而訂下有關太平街嘅規矩。

劇集除咗題材新鮮之外、仲有實力派演員及「人氣王」姜濤參與，相信唔少劇迷都會好期待呀！

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！