【ViuTV吐氣揚眉】冇得播世界盃賽事 無綫劇集收視跳樓式下跌

2018年俄羅斯世界盃已經喺6月14日開始舉行，今屆由Now TV 及 ViuTV獨家播放，有19場賽事仲喺ViuTV免費播放 。無綫對於世界盃直播完全無驚過，一於hea爆迎戰，除咗平日播返三線劇外，周日播放節目《爸爸的告白》及《深夜美食團》去迎戰世界盃。

有消息指ViuTV收視屢創佳績，德國對墨西哥（6月17日）當晚最高收視率達到16.1點（約105萬人次收睇），而平均亦有14.2點（約92萬人次收睇）。網上平台都唔差，串流收看量都有28萬人次觀看。而無綫當晚收視大跌，《深夜美食團》由原來平均9點（約58萬人次收睇）跌到得5點（約32萬人次收睇），《晚間新聞》由平均8點（約52萬人次收睇）跌到4點（約26萬人次收睇），全部都大跌。

而冷門少少嘅瑞典同韓國（6月18日）就喺黃金時間開始，平均收視有10.2點（約66萬人次收睇），最高有14點（約92萬人次收睇）。而當晚無綫三線劇收視更跳樓式下跌。《愛．回家之開心速遞》平均收視大跌7.4點（約48萬人次收睇），只有14.5點（約95萬人次收睇）。《宮心計2深宮計》就跌咗6.6點（約43萬人次收睇），平均只有16.6點（約109萬人次收睇）。《飛虎之潛行極戰》亦跌咗3點（約20萬人次收睇），平均收視17.7點（約116萬人次收睇）。

而家分組賽已經跌到咁，嚟緊仲會有準決賽及決賽等賽事，如果無綫唔想繼續跌嘅話，睇嚟真係要諗吓計仔喇！