雅虎香港新聞 Winka 專訪｜《一手造成》自唱愛情經歷 結束6年情自省求變 「我唔會拍拖住」
COLLAR成員 Winka（陳泳伽）上月推出首支單飛新曲《一手造成》，開宗明義是自身愛情經歷的反省，同時亦公開結束一段 6 年情，幾多可惜和難過，仍要接受感情有走到終點的一天，「呢首歌出咗之後，就係一個放低嘅句號。」現階段的她，只想專注調整自己的步伐，坦言未準備好進入一段新的關係，「我會覺得，現階段的自己未必能夠，promise 對方有個行一世嘅關係，所以我就唔會拍拖住。」
Winka 2021 年參加《全民造星 4》後以 Collar 出道時，已公開有圈外男友，對方從事金融業並全力支持她追夢。推出新歌《一手造成》後，Winka 亦在社交平台承認，兩人去年中已和平分手，因雙方的步伐有分歧，故決定主動提出。有人質疑她「消費」前度，Winka 當時也反駁，自己並非對感情兒戲的人，「先放下嘅人，唔代表唔會不捨同難過。」
新歌代表了一個句號
《一手造成》是一首慢板情歌，MV 拍出了一個傷感的愛情故事，Winka 飾演的女主角在舊居執拾自己的物品離開，期間回憶彼此過去曾經親暱的畫面。問到 MV 是否帶有個人的元素，Winka 說 MV 中女主角愛用錄音機錄低相處的細節，自己也是一個愛記錄的人，「可能現實世界我未必會用casttee錄音，但我好鍾意瘋狂影相、錄片呀，或者係大家以前一齊做歌、busking 的片段。」
Winka 過去曾有過兩段感情，她形容新歌「都幾自己」，因為是來自「自己嘅 love story」，新歌融合了兩段感情的經歷和感受，想分享愛情中如何自我反省，貫徹其喜愛「講經」的性格，帶出「懂得去愛另一半嗎？」這訊息，「拍拖時會嫌棄對方呢樣嗰樣、覺得對方錯，但回頭諗一諗其實係自己問題，所以分手結局都係自己一手造成。」
雖然新歌帶有自己的故事，注入了真摯的情感，但對 Winka 來說新歌能夠面世，已是代表一個完結，「我會覺得，呢首歌出咗之後，就係一個放低嘅句號。人生有好多路、好多事發生，有好多地方要去，有唔同嘢會經歷。有啲嘢 take 咗一個課堂之後，消化完就放低。呢首歌做完嗰下，就係我放低嗰下。」
正如 MV 裡，女主角最後執拾完畢，離開前問男主角，可否為她錄最後一句話，「你話，『我哋分手啦』，好唔好？」Winka 說，這個細節是導演的構思，「導演應該係想帶出，一段關係有開始也有正式結束，類似呢段愛情、呢啲經歷全部可以喺度畫上句號，然後再慢慢開始新嘅一個journey，開始返新嘅一段人生。」
望以自身故事影響他人
新歌面世一個多月，外間對 Winka 有不少批評，認為她在「消費」前度，Winka 曾在社交平台反擊，認為分享自身故事無問題，沒需要隱瞞，只是如實作答。不過專訪當日，她明顯已不欲多談現階段的私人感情狀況。對於音樂，她說，沒有刻意要用愛情來切入，或為自己定位，「最重要係要做自己出完，都會覺得有滿足感嘅作品。」
講出自己的故事，因為她相信，可以讓有共同經歷的人得到共鳴，「我都唔係perfect嘅人，都會有咁樣嘅時候，如果你都處於呢個階段，不如一齊反省，或者做一啲改變。」她想為別人帶來正面的影響，「做公眾人物，我嘅諗法係，我嘅故事講出嚟，如果同我有共同經歷、或者差唔多性格、諗法嘅人，能夠得到一啲解脫、安慰，或者參考，知道事情可以點樣處理。」
「我覺得係一個影響，我自己做緊一個影響人嘅人，慢慢向緊呢個方向做。」
參加《全民造星 4》之前，Winka 已曾以獨立歌手身分出道，推出過單曲〈無名〉、自己親自作曲的〈Cupid-19〉。未來，她也想向唱作人進發，坦言自己對很多事都會有自己的看法，而音樂對她而言「就係日記」，記錄她每個人生階段的想法和感受，但需要時間沉澱，「我每日都有好多題材，有多啲靈感想講，但係要講邊樣，要去消化同梳理。」
完成一首作品去記錄過去的愛情，回到單身狀態，Winka 說，正在嘗試調整自己的狀態，感情事暫時不會想太多，「而家我會諗嘅嘢就係，搞掂自己先，搞掂自己嘅狀態，自己嘅諗法。能夠咁樣做，我先至會真係開始一段新嘅關係。」
夢想開個唱 想跟過去的自己講：你做得好好
對於成團後首次出 solo 歌，Winka 說初頭既興奮也緊張，「慣咗有 7 個姊妹陪住」，後來慢慢在表演和練習的過程中克服，例如早前的 clockenflap 上的 solo 舞台，「原來都 handle 到。」問她 Solo 音樂上的目標，「最遠大的目標，一定係會想開一個自己嘅個唱。嗰個目標係一個，夢想般的存在，中間有好多細細嘅step，要靠每一次做好眼前的工作。」
Winka 在單親家庭成長，中學時因家人健康問題，她要獨力照顧弟弟，放學後要做兼職賺錢，更曾因而停學，成長過程經歷不少障礙，後來自資做歌手樣樣親力親為，一步一腳印咬牙走來，如今事業正在起步。問她有甚麼話想跟過去的自己說？她想了想，篤定道，「我會覺得，好多時候你會好任性呀，或者有啲我行我素，但係你做得好好，因為有自己嘅堅持同埋性格，先至可以行到今時今日。希望你之後都可以堅持自己的東西，做得更加好。」
