做MIRROR師妹！《全民造星4》今日開始報名 林二汶推辭唔做導師

一直有傳今年ViuTV會製作《全民造星4》，終於上星期五《調教你MIRROR》入面就出咗《造星4》接受報名嘅宣傳片，並且公布今季會係首次招收女參加者！

至於報名網頁就喺今日推出，裡面提到「《全民造星IV》將投放資源，透過節目選拔一隊全能女團，我們相信，女團非韓團專利，香港一樣做得到，甚至更出色。」。似乎入圍並且留到最後嘅參加者，有機會組團成為MIRROR同 ERROR嘅師妹。曾經喺《造星3》講過唔想收女仔嘅監製花姐，唔知今季會點應付？

不過花姐首先要搞掂導師人選，因為上一季嘅導師林二汶喺IG宣布，已經口頭上推辭花姐嘅邀請，唔會做《造星4》嘅導師。二汶寫道「上台容易落台難。我想像，如果我再次做導師，我都難以超越上一次嘅自己。既然唔能過做得更好，何不讓更多有才之士去做？經過深思熟慮後，我先下哩個決定。」，佢又衷心感激花姐同ViuTV俾佢呢個機會，仲透露將會籌備一間音樂教室，並已經搵到地方同導師。

《造星3》節目最大亮點可能係搵到彭秀慧同林二汶做導師，二汶仲碌人情卡搵老友梁祖堯幫手編排演出，令到成個show嘅可觀性提高。有傳花姐因為想《造星4》唔止要參加者表演跳唱，仲會有綜藝同戲劇演出，於是搵梁祖堯做導師，而阿祖亦講明好願意，但係就唔想同二汶做對手。如果二汶唔做，會唔會影響阿祖做導師嘅成數？另一位戲師彭秀慧又會唔會留低？似乎節目未播就有大把花生食！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！