雅虎香港新聞 
《城寨》大結局 牙佬朝霞溫馨鏡頭被消失
熱爆全城的無綫話題劇《城寨英雄》，昨晚終於播出大結局！雖然早前有多個受歡迎的角色如朝霞、龍成虎等相繼死去，但最後拳佬及牙佬等人成功擊敗終極大佬楊竹鑾，城寨回復安寧，而拳佬刁蘭亦可雙宿雙棲！而飾演朝霞的王君馨早前在網上透露，會在大結局再度登場與牙佬談情，但小編成晚只見童年時的朝霞！難道朝霞咁受歡迎都「被消失」？
終於嚟到大結局，拳佬(陳展鵬飾)、牙佬(袁偉豪飾) 及泰婆(元秋飾) 跟終極大佬天干(歐瑞偉飾) 決戰，不過對方有鐵布衫護體刀槍不入，而且身上的「罩門」(類似死穴) 可以隨時轉移到身體不同部位，所以無論點打都打佢唔死！
已失明的拳佬係唯一感應到天干罩門的人，但佢當下方寸大亂未能冷靜，於是刁蘭為佢送上一個熱吻！拳佬被吻後不單冇興奮，反而冷靜下來成功「睇到」罩門！其實透視眼呢一幕，監製係咪向《廿二世紀殺人網絡》或者《夜魔俠》致敬？
拳佬成功搵到對方罩門後，即時就打到天干嘔晒血，不過佢當然唔會咁易收手，仲捉咗畢得了(林子善飾) 做人質！
點知畢得了都唔係吳下阿蒙，趁亂鎖實天干雙手，讓拳佬及牙佬雙雙使出絕技「猛虎硬爬山」！殺人無數、擾亂城寨安危、仲有令觀眾晚晚左猜右想的終極大佬，終於爆頭而亡……
城寨回復安寧，泰婆同德莉一齊經營泰國菜館，仲話將來要將九龍城變成小泰國！原來現時人人都去九龍城食泰國菜，都係多得泰婆咋！
德莉唔再係大小姐，變成一個武藝非凡的泰拳高手！
至於畢得了亦盡得段家八極真傳，代替牙佬教學生！
咁拳佬同刁蘭呢？觀眾早前見到拳佬戴黑超流淚一幕，都以為佢對眼一直失明，而刁蘭亦不在人世… 點知大家都錯晒！不但拳佬醫好對眼睇番嘢，就連刁蘭都去美國醫好心臟病，從此幸福甜蜜地生活下去… 雖然之前死咁多人，不過拳佬刁蘭最終可以終成眷屬，相信觀眾都收貨啦！
《城寨英雄》中不論主角配角，角色個個搶鏡，而王君馨飾演的朝霞/花曼特別深入民心！早前朝霞被殺，觀眾大呼不捨，就連陸永個可愛女兒都因此睇到爆喊！
昨晚播出大結局前，君馨就在IG上載一張朝霞與牙佬的劇照，約定大家在兩人定情的「九記麵檔」見，仲講明係不見不散，即係大家可以在大結局再見到朝霞啦！但係小編睇咗成晚，都剩係見到童年版朝霞露一露面，說好的不見不散呢？
大結局播完後，君馨在IG開估，原來大結局中有一場佢同牙佬的溫馨談情戲，可惜最終被刪冇出街，佢感慨寫道︰「一場我很喜歡的戲，但最終卻沒有在螢幕出現。即使他們相隔很遠，但他們的心永遠在一起！」
其實唔止大結局談情戲，早前君馨在《新地》FB陪大家邊Live Chat邊睇劇，佢話自己本來有一段玩啤牌玩得出神入化的片段，但最終被刪，君馨對此大感失望！因為佢話自己為此苦練咗幾日，但都未能讓觀眾欣賞到。君馨咁努力，希望未來佢會有更多機會演出，做多啲好角色俾觀眾睇！
