張國榮歌迷長文質疑《梅艷芳》劇情失實 戥哥哥唔抵「還要為殘敗的香港影壇盡心盡力」

紀錄一代天后梅艷芳嘅電影《梅艷芳》本周正式上畫，但係早前電影公司已經搞咗唔少優先場，好多人睇完各有意見，普遍都係正面嘅。電影刻劃咗梅姐同哥哥張國榮2位巨星嘅友誼，不過有哥哥歌迷發長文，指控電影情節與事實不符。

處名「斐妮小思」嘅「哥迷」喺張國榮國際歌迷會fb專頁發千字長文，質疑戲中對梅姐同哥哥交情嘅描寫。首先，戲中提及1982年梅姐與哥哥喺得到新人獎之後同台登台，但梅姐喺現實訪問中提到，同哥哥合作過4年，1982年嗰陣佢地應該已經互相認識。而且歌迷指出，梅姐過去提到同哥哥去大馬登台，夜店有大哥搞事，都係哥哥出面拆掂，加上1982年哥哥事業正在上升，同電影中哥哥喺夜店唱完歌冇人理，要搵梅姐開解嘅場面有出入。

「斐妮小思」又對片中暗示梅姐拍《胭脂扣》令哥哥嘅十二少戲份增加好不滿，因為哥哥生前喺大學演講，憶述係編劇李碧華受自己魅力打動而加多啲戲份俾佢。

撰文歌迷認為，《梅艷芳》唔係哥哥自傳，但係利用張國榮「大肆宣傳又竄改編造」，更道「一邊1:1還原他的葬禮盛大宣傳賺人熱淚，一邊又要用調轉年份杜撰事件的方式，來扭曲真實歷史與個性，這樣的兩面手法恕我無法接受」。「斐妮小思」文末對於電影加插哥哥葬禮上根本不存在嘅瞻仰遺容環節，感到欲哭無言，感嘆「他真的給的太多了，離開18年後，還要為了這個已經殘敗的香港影壇盡心盡力，希望您安息，不要再被那些扛著致敬大旗，行著消費之實的有心人打擾了」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！