捲入性侵案中外男星下場 有人坐5年監 甩身唔代表有得翻身

吳亦凡因涉嫌強姦罪而被刑事拘留，震撼兩岸娛樂圈。有消息指內地執法機關掌握有力證據至採取行動，所以吳亦凡恐怕難逃牢獄之災，星途毀於一旦。

藝人犯法本身就影響形象，涉及性侵就更加惹人反感，過去都有藝人捲入性侵官非，被判有罪固然要坐監，但係即使甩到身，都唔係咁易翻身！

高雲翔

內地男星高雲翔因為喺劇集《羋月傳》飾演深情嘅義渠王而人氣上升，不過2018年喺澳洲拍戲嘅時候，就同內地製作人王晶一同被控性侵一名36歲女子。高雲翔被扣留3個月之後獲得保釋，但係保釋金就要超過1500萬，太太董璇立即撲水救夫，不過一年後董璇同高雲翔宣布離婚。官司糾纏2年幾之後，法庭判高雲翔無罪，但係由於形象插水，多套拍好嘅劇集無法播出，高雲翔冇收入之餘仲要應付劇集製作方索償超過6千萬人仔嘅官司，有排頭痕。反而前妻董璇因為事件而搏得觀眾支持，人氣有增無減仲傳出新戀情。

鈕承澤

曾執導《艋舺》嘅台灣演員兼導演鈕承澤，2018年11月喺屋企非禮劇組女助理而被起訴。鈕承澤出庭作供表示認為同對方互有好感，但法院唔同意呢個講法，判鈕承澤有罪，入獄4年。鈕承澤不服並提出上訴至高等法院，高院維持原判，而鈕承澤亦再次申請上訴，正接受保釋。案件未有裁決，但鈕承澤已經冇嘢撈，最慘嘅係佢開拍嘅電影《跑馬》因為呢件事而無限期停拍，男主角任賢齊為部戲而增肥到220磅嘅心血全部白費。

鄭俊英、崔鍾訓

2019年初南韓警方調查男團Big Bang成員勝利嘅夜店性交易及毒品案期間，喺勝利手機嘅社交媒體，搵到一個聊天群組，裡面居然有女性被迷姦嘅短片。群組成員有韓星鄭俊英同埋樂隊FTIsland隊長崔鍾訓等人，引起外界嘩然，鄭俊英主持嘅節目全部被取消，崔鍾訓亦宣布退團。南韓警方以涉嫌迷姦及散播偷拍不雅影片等罪名作出起訴，最終鄭俊英被判監5年，崔鍾訓判監2年半。

曾德華

佢算唔算係星？曾經喺周星馳電影客串嘅曾德華（蜥蜴仔），09年被控強姦15歲中三女生而被重判監禁7年半，11年上訴得直改成非禮罪而提早獲釋。案情指蜥蜴仔網上認識受害人之後，聲稱自己可以介紹對方入娛樂圈，事發當日同蜥蜴仔見面，後來被帶到賓館侵犯。獲釋後嘅蜥蜴仔依然留戀娛圈，自資製作歌曲仲拍MV，又搵人搭路北上登台。上年疫情影響下，蜥蜴仔手停口停，於是轉行做外賣仔。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！