網上直播4千萬人睇 草蜢答應跑勻全世界開騷

【星島日報報道】相隔19年，草蜢再度推出全新國語專輯《Music Walker》，日前空降北京舉行發布會和專輯首演會，首次演唱新專輯內的作品，網上直播觀眾直迫4千萬人次，草蜢勁振奮，答應跑勻全世界開騷。 現場觀眾熱情反應令草蜢好驚喜，蔡一智說：「佢哋從各地專程飛到北京支持我哋，音樂響起全場都聞歌起舞，就連記者們都跟住節奏一齊跳一齊唱，好熱情，令我覺得有如在紅館之巔，好high！」蔡一傑則被哭成淚人的男歌迷真情打動，「有一位男歌迷上台玩遊戲比賽跳舞贏咗，我哋即場親筆簽名CD送畀佢和合照，佢可能唔相信終於與草蜢同台仲咁親密接觸，開心到喊，最初我都唔敢相信，但佢愈喊愈勁！」阿智也動情：「平時只係見到女歌迷咁激動，第一次見到男歌迷喊，仲要係男子漢當眾喪喊，令人憐憫，我哋一時之間都手足無措，唔知點安慰佢，佢的真心真意，我哋好感動！」 蘇志威則謂：「今次音樂會仲有好多令我哋好感動的時刻，其中有幾個跟咗草蜢好多年的歌迷，帶咗一大箱珍藏嚟，包括好多本剪貼簿和卡式錄音帶，20幾年來的珍藏。佢哋都係北京歌迷，當年係托朋友喺香港買報紙、買卡式錄音帶寄去北京，好有心，我好感動！」阿智讚歎：「佢哋珍藏咗草蜢成個青春！」

睇更多