雅虎香港新聞 
艷舞女變鄰家女 仙氣花曼驚艷登場
今個星期《城寨英雄》進入結局篇，楊老闆/天干(歐瑞偉飾) 的魔爪步步進逼，城寨眾人命運坎坷，繼之前三巨頭全滅、小智慘被炸死後，主角們陸陸續續都會有悲慘結局！雖然大家晚晚都準備定紙巾，不過昨晚一集有花曼(王君馨飾) 由風情萬種的艷舞女化為清純鄰家女孩，雖然唔再晒身材，不過感覺勁有仙氣，令人驚艷！
劇情講到殺手甲辰(張頴康飾) 與拳佬一樣深愛刁蘭，於是佢相約拳佬過招，試試佢有沒有能力保護刁蘭。兩人在黑暗的後巷對決，幾乎要下殺手之際，刁蘭突然出現阻止！
刁蘭知道兩人係為自己而打，於是即時講出心中所愛，佢堅定咁話現時只係鍾意拳佬一人，以後都係一樣。甲辰聽到後亦尊重對方意思，決定退出。
雖然同鄉會三巨頭已死，但城寨好快又再出現黃、賭、毒事業，有唔少城外幫會打算到城寨分一杯羹！拳佬牙佬等人知悉後，隨即回到福利會商量對策。
呢個時候楊老闆就提出，黃、賭、毒難以滅絕，所以應該由福利會出手管理，以減少它們的禍害。拳佬對此堅決反對，牙佬雖然��致上同意拳佬，不過亦認為楊老闆一番話不無道理，內心動搖。其實楊老闆就係想藉呢個政策分化拳佬及牙佬，屆時控制福利會！
楊老闆開會後回到缽仔糕廠，原來甲辰早已在內等候，大家都知道楊老闆就係當年殺害段通天的殺手，而甲辰此時稱呼佢為「天干先生」，即楊老闆其實係整個殺手組織的頭目！佢在甲辰的協助下，將一步一步分化福利會眾人，控制城寨；而甲辰完成任務後，就可以與刁蘭遠走高飛，正式脫離殺手組織。
雖然楊老闆的陰謀正一步步實行，城寨眾人將面臨重大危機，不過呢集觀眾最深刻的，如終係王君馨飾演的花曼！
劇情講到牙佬憶起小智之死而傷心，不過一轉頭隨即望到着晒迷… 原來係花曼踩單車嚟搵佢！今集花曼卸下濃妝豔抹，再沒有性感旗袍，取而代之的是簡單妝容及樸素衣裳；佢邊踩單車，見到心上人時嫣然一笑，實在係太有仙氣了吧！
見到牙佬後，花曼話自己踩到有啲攰，叫牙佬載埋佢，仲話對方去邊佢就去邊！相信世上冇男人可以抵抗到…
之後牙佬就載住佢遊單車河，花曼幸福地攬住對方挨到實，成個畫面非常浪漫！
殺父仇人死清光，成功還父親一個清白，又可以用真名「朝霞」光明正大地生活，難怪花曼咁開心！兩人望住大海咁浪漫，當然就情不自禁錫錫啦！可惜編劇唔係咁諗，兩人不久後就會陰陽相隔…
全文完
