鼎爺FB出片否認係黃淑儀師傅

orientalsunday.hk

更新日期： 2017年1月23日上午5:06

人稱「鼎爺」的無綫資深藝人李家鼎，人所共知功夫及騎術皆了得，但估唔到佢廚藝都非常出色！佢早前在《阿爺廚房》中大顯身手，教觀眾炮製各式各樣的傳統粵菜，平時惡形惡相的鼎爺在節目中流露溫柔細心的一面，所以不單節目有口皆碑，連佢本人亦人氣急升！不過早前發生一個小誤會，誤傳另一煮得之人黃淑儀（Gigi）為鼎爺徒弟！所以鼎爺繼早前公開澄清後，日前在其Facebook專頁（新潮爺爺？）上載與Gigi姐的短片，睇吓佢點講先！

圖片：新傳媒資料庫、Facebook

《阿爺廚房》顯功架

功夫及騎術皆了得的鼎爺，在劇集中經常扮演奸角，令其惡人形象深入民心，點估到佢廚藝都咁勁！原來鼎爺的已故父親係一個大酒樓東主，所以佢自小已接受嚴格的廚藝訓練，今次在《阿爺廚房》中盡顯純熟刀法，炮製出一道又一道年輕小編聽都未都聽過的古法菜式，叫人嘖嘖稱奇！自此鼎爺成為大紅人，男女老幼都愛他，冇人再驚佢惡死啦！

鼎爺都有Facebook

鼎爺在節目中介紹的菜式實而不華，使用的「架生」亦是實用大於美觀，貼近一般家庭。又估唔到鼎爺除了菜式貼地，日常生活都一樣！佢在Facebook有一個叫「李家鼎CrazySteve」的專頁，入面有短片又有型仔相，果然係個潮爺爺！

孖Gigi姐拍片澄清

鼎爺爆紅後，早前竟傳出另一位煮得之人Gigi姐原來係鼎爺徒弟！鼎爺接受訪問時謙虛地否認，稱兩人於70年代拍攝《書劍恩仇錄》時結緣，當時鼎爺有份演出亦身兼武指，與Gigi姐有唔少交流，所以算係對方武術上的師傅。但如果係廚藝方面，鼎爺就強調絕對唔係！日前鼎爺在Facebook的短片中與Gigi姐齊齊亮相，兩人一見面就攬頭攬頸，鼎爺仲好招積咁話，自己當住Gigi姐老公面前都係照攬對方！睇嚟兩人感情真係非常好。