《中年好聲音》12強名單誕生！合體拍攝《不再猶豫》MV獲網民一面倒力讚

無綫歌唱選秀節目《中年好聲音》12強已從第五部曲次回合《譚校長金曲！爭入12強！》誕生，該集《中年好聲音》收視更屢創佳績，最高收視錄得24.7點亦係無綫上周最高收視嘅節目，勝過《東張西望》及處境劇《愛‧回家之開心速遞》。擔任嘉賓評判嘅譚詠麟相當滿意眾參賽者嘅表現，仲分別畀李佳、顏志恆、涂家堯19分高分，支嚳儀則獲得呢個回合嘅MVP，魏嘉信、何博文及鮑聖光則被淘汰，餘下12強名單就包括周吉佩、羅啟豪、龍婷、支嚳儀、曹敏寶、吳大強、梁浩銓、顏志恒、涂家堯、林鉫徫、丁文俊及李佳。譚詠麟接受媒體訪問時大讚支嚳儀，表示無論係今集佢喺改編、演繹定整體感覺方面都令佢眼前一亮；而吳大強就有好大轉變，不但由唱英文歌轉為挑戰廣東歌，演出時亦好有台風。

《中年好聲音》12強日前翻唱BEYOND《不再猶疑》，呢個版本仲搵嚟評審之一又係資深音樂製作人嘅伍仲衡重新編曲，透過歌曲訴說追夢心路歷程，並且從一人一句獨唱中將各人特色及長處呈現。3分鐘足本版本《不再猶豫》MV於昨日（6日）晚上8點半翡翠台首播，See Saw先社交平台亦同步播放，MV中12強以紅、白、黑色調造型配以皮褸、鍋釘等元素登場，化身Rock仔Rock女。12強拍攝《不再猶疑》MV期間，無綫總經理曾志偉更加帶同飲品及蛋糕到場探班，可見受寵程度相當高。

《不再猶疑》MV於See Saw先YouTube Channel上架，網民留言表示睇到好感動，又指絕對支持《中年好聲音》：「拍得超正！睇到第一part他們在中年好聲音比賽中的心路歷程！好感動呀！」、「『「自信打不死的心態活到老」每星期真係追住睇呢群為熱愛歌唱的勇者們。睇到那份毅力和熱血的精神，由內燒到外』「非常替這班參賽者高興，走到這部已經不論輸嬴，因為我已覺得他們每位都各有各風格」、「中年好聲音係近十年TVB 最好節目」、「唱得好好聽突顯每人風格」、「恭喜12位參賽者圓夢了！」及「這12個參賽者睇落去又真係有啲星味」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！