【同叱咤撞期】《聲夢維港 Party Together 演唱會 2022》元旦日開騷 門票索價最貴$8,800

無綫歌唱選秀節目《聲夢傳奇》大受歡迎，炎明熹（Gigi）、姚焯菲（Chantel）及鍾柔美（Yumi）等學員人氣急升，15位學員早前更舉行一連四場《聲·夢飛行FIRST LIVE ON STAGE》音樂會，而佢哋主演嘅校園青春劇《青春本我》亦於下月5日首播，明顯備受力捧。除此之外，無綫宣布聲夢學員聯同星夢歌手2022年元旦日喺中環海濱活動空間舉辦《聲夢維港 Party Together 演唱會 2022》，門票價格由380元至8800元嘅豪華VIP 6座位不等。

《聲夢維港 Party Together 演唱會 2022》喺2022年元旦日與16000名市民歡度元旦，而表演歌手包括菊梓喬（HANA）、吳若希、 JW王灝兒、胡鴻鈞 、吳業坤、鄭俊弘、譚嘉儀、 谷婭溦、林穎彤、謝東閔、戴祖儀、涂毓麟（Oscar） 、施匡翹 、伍富橋及《聲夢傳奇》學員炎明熹（Gigi）、姚焯菲（Chantel）、鍾柔美（Yumi）、冼靖峰（Archie）、 何晉樂（Rock）、文凱婷（Aeren）、林君蓮（Kaitlyn）、林智樂（Felix）、詹天文（Windy）、張馳豪（Aska）、潘靜文（Sherman）、孫漢霖（火雞）、林沚羿（Venus）、蔡愷穎（Lolita）。

消息一出，邵子風喺個人社交網站轉載海報並留言話「這張Poster不得了…」，唔少網民都紛紛留言海報設計娘味濃，紛紛留言話：「咩呀，根本係酒樓跳舞poster」、「key上去架全部人個頭？好似酒樓嗰啲歌手海報」、「XX社區中心懷舊金曲夜」、「leung味濃郁」及「十足十喺小巴貼果d慈善粵曲音樂會海報」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！