《超能使者》掀全城競猜嫌疑人 究竟邊個係Final Boss?

TVB台慶劇《超能使者》正在熱播中，近日劇情轉折，高潮迭起，吸引唔少網民熱烈討論。監製文偉鴻（Jazz）以往劇集《使徒行者》、《城寨英雄》及《鐵拳英雄》都掀起「全城競猜熱」，今次網民又再次估究竟邊個係Final Boss?

沈震軒
沈震軒飾演威仔喺第8集出場，唔少網民除咗大讚佢演技出色之外，同時亦懷疑佢係Final Boss，因為一個人冇可能遇到一宗死亡交通意外後會走人，同埋沈震軒亦透露過威仔係有好強勁嘅超能力。

劉佩玥
劉佩玥飾演嘅丁淑敏被導演指係關鍵人物，同時亦有唔少網民質疑佢個BB唔係阿鏈（陳展鵬飾）。去到噚晚嗰集，劇情就講到丁淑敏紅杏出牆被阿鏈發現，佢仲淡淡然咁話要離婚，不過喺阿鏈苦苦哀求下成功挽回婚姻，後來Q姨（唐詩詠飾）揭穿丁淑敏及阿鏈家人根本並不存在。有網民猜測丁淑敏有可能係阿鏈嘅心魔，亦有網民估計佢可能有控制別人思想嘅超能力，因為佢有幾集啲頭髮變咗紫色。

陳展鵬
Q姨（唐詩詠飾）揭穿丁淑敏及阿鏈家人根本並不存在，所以有網民估計阿鏈係患有精神分裂，喺車禍發生後嘅昏迷期間夢到嘅嘢，所有嘢都唔係真嘅，最後佢發現自己身處精神病院。

歐瑞偉
歐瑞偉今次喺《超能使者》飾演大反派賀慶隆，佢同韋瑞琦（王君馨飾）係競爭對手兼天敵，經常同囝囝Dickson（陳國峰）四處做壞事。因為佢喺《城寨英雄》飾演過Final Boss，所以令網民猜測今次有機會再一次多位主角聯手對付佢。

王君馨
王君馨喺劇中飾演和聯發頭目兼夜場老闆娘韋瑞琦，雖然佢表面係社團頭目，不過好似收埋好多不可告人嘅秘密，令到有網民估佢係一名臥底，另外亦有網民估佢想做社團話事人，所以佢都有可能係Final Boss。

張國強
喺劇中飾演袁叔嘅張國強，背面心地善良，雖然因女兒韋瑞琦混入黑道而與其反目，不過袁叔都係口硬心軟，好希望佢可以退出黑道。雖然佢表面唔似係Final Boss，不過網民認為佢好有做反派嘅特質，因為咁樣先有反差。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！