《驚天激戰》成串流收視之冠 低成本片要突圍有呢三大要訣︳電影LOL

電影票房以外，串流平台收看次數對電影嚟講都係重要指標。同正規上畫片一樣，唔少片商以為大堆頭製作就係票房收視保證，同時又會有聰明嘅幕後低成本搏出好成績。7月中喺Netflix上架嘅電影《驚天激戰》(Land of Bad），成本唔算高只有2千萬美元，但係就成功登上播放次數榜冠軍。

故事係以美軍一次喺菲律賓嘅任務之中出事，行動部隊得返一位成員Kinney生還。代號「死神」嘅無人機機師，要遙距指揮Kinney逃出生天。呢類戰地背景動作片，聽落睇落幾有大片格局，炸飛機噴子彈之外，而且仲要有金像影帝羅素高爾飾演「死神」。2千萬成本對荷里活製作而言只能稱為中低額投資，居然拍出燒鵝嘅味道，仲要拎到收視冠軍，好多人都想知點做到。

《驚天激戰》2位監製最近向外媒IndieWire公開咗三大聰明駛錢方法。首先，《驚》故事發生喺東南亞，唔出埠留喺美國拍當然得，但係劇組計過數，去澳洲拍匯率抵好多，同一舊錢可以比喺美國取景拍多一半時間。而且羅素高爾同另一男主角Liam Hemsworth（「雷神」Chris Hemsworth細佬）一個係紐西蘭人一個係澳洲人，咁近屋企，點會唔ok？

對於獨立片而言，要突圍嘅方法之一係靠「明星光環」。不過話明「明星」又點會收得少？以往唔少獨立片為咗有星撐場，唯有搵高峰期已過嘅阿哥阿姐演出，結果俾完片酬就冇錢做製作。羅素高爾呢位影帝都6字頭，可以揀豐厚片酬嘅爛片搵夠等收山，但係監製就賣口乖話羅素好喜歡《驚天激戰》個劇本同角色，而且處事方式與眾不同……我估佢意思係羅素高爾比起其他大星「收順咗」。

而家唔少串流片都冇喺戲院上映，但《驚天激戰》原來年頭都有上過戲院放映。監製話佢地只有30萬美金宣傳部戲會喺全美國千一間戲院上映，但係埋單收到650萬。搵多筆之外，最重要係可以產生口碑，等到套戲Netflix上架就自然吸引到人去睇。說穿了，即係都係要拍好套戲，有麝自然香囉～

更多電影文章

紮職3／長腿／烏鴉：重生／Look Back -驀然回首-／心動50年︳電影LOL 今期睇咩戲

李小龍之子李國豪遺作 《烏鴉︰重生》票房失利 製作過程障礙多多再添邪氣︳電影LOL

《小孩不笨》拍到第3集 唯一不變嘅可能就係家長依然係怪獸？︳電影LOL

《痛愛完成式》主角不和新進展 Blake Lively被指利用家暴題材sell自家產品︳電影LOL

《撞鬼遇到愛》驚嚇搞笑愛情催淚炒埋一碟 用真鬼開鬼屋搵大錢︳電影LOL

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！