【電影LOL】外媒勁眼利 中央台一幅圖睇出 Marvel新片《尚氣》《永恆族》可能被內地封殺

又有電影辱華被封殺？話說內地官方媒體中央電視台電影台CCTV6近日報導，漫威(Marvel)即將上映嘅片單，當中包括7月上映嘅《黑寡婦》、12月上映嘅《蜘蛛俠：不戰無歸》，連後年先上嘅《銀河守護隊3》都有，偏偏無咗有梁朝偉、劉思慕主演，漫威首部亞裔超級英雄片《尚氣與十環幫傳奇》以及新出爐奧斯卡金像獎最佳導演得主趙婷執導嘅《永恆族》。

外媒Variety勁眼利，CCTV6報導一出即時留意到，專業分析內地電影市場有限額，最後能否於內地公映取決於政府審批。漫威第4階段10套新片獨漏《尚氣》及《永恆族》應該唔係手誤咁簡單，2部電影好大機會唔俾上映。

《永恆族》導演趙婷早前被翻出舊訪問內容，指自己中國嘅童年生活充滿謊言，加上一句「美國現在是我的國家」（American is now my country）而被內地網民圍誅，就算之後澄清實際內容係「美國不是我的國家」（American is not my country）都救唔返。就算喺奧斯卡大放異彩、橫掃4項大獎，被譽為「華人之光」都無用，「趙婷」變成禁語，連帶得獎作品《浪跡天地》都被禁。

趙婷因為訪問講真話被屈成「賣國賊」，觸動國家神經，新作《永恆族》內地無期都叫做事出有因。《尚氣》唔俾上嘅原因似乎牽強少少。

外媒Variety歸納出幾個原因，當中梁朝偉飾演嘅角色，即漫畫中嘅「滿大人」，角色原型「傅滿州」於西方等同「黃禍」，角色調整成「文武」，一樣有貶低中國人之嫌！據聞梁朝偉因此被禁，連帶其他作品《風再起時》都攞唔到批文。

另外，《尚》預告片當中出現嘅場景仲停留喺燈籠、功夫、紅噹噹等中華文化刻版印象，唔ok。男女主角劉思慕及Awkwafina最無辜，其中一個上唔嘅原因係兩位眼細，完全符合唔到內地嘅審美標準！

對於2位主角嘅長相，唔少網友不留情面狠批，仲勁插漫威cast埋啲外國人先覺得靚嘅「鳳眼樣」，存心歧視中國人外貌喎。自己人對自己人真係寧舍harsh，明明Awkwafina係中國移民後代仲返過北京讀書，兼係首位華人金球影后！而劉思慕哈爾濱出世，5歲先移民加拿大。

2位貨真價實中國人血統，近年憑戲劇喺北美市場殺出血路成為演藝紅人，根本係人在他鄉成功出頭勵志故事。可惜唔需要原因，總之佢哋天然無加工嘅外表就係辱華！

劉亦菲喺內地有個朵叫「仙女姐姐」，《花木蘭》喺內地一樣仆直，得失內地嘅原因真係千奇百趣，估你唔到！

更多電影文章

【電影LOL】今期睇咩戲 《感動她77次》《太太，請小心輕放劇場版》《屠出殺樂園》《誣罪審判》

【電影LOL】瘦到背脊見骨！彭于晏減磅拍《熱帶往事》演變態殺人犯

【電影LOL】被指白人主導兼恐同 電視台、影星齊齊杯葛金球獎 湯告魯斯退還獎座

【電影LOL】玉女Lily James演90年代波神 還原荷里活明星性愛片流出事件

【電影LOL】Ironman羅拔唐尼倒戈幫DC開新戲《鹿角男孩》 竟然係暗黑版《小鹿班比》？

【電影LOL】Emily in Paris 第2季全員巴黎準備開工 女主角情歸何處？

【電影LOL】Marvel 晒冷預告片 預視未來5年MCU有咩大片 《永恆族》片段首度曝光

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！