【電影LOL】被指白人主導兼恐同 電視台、影星齊齊杯葛金球獎 湯告魯斯退還獎座

·3 分鐘文章

金像獎及金球獎喺荷里活舉足輕重,不過今時今日恃住地位崇高都不足以橫行兼固步自封!2個頒獎禮以往星光熠熠,得到位位荷里活明星盛裝出席,但近年被指控「白人主義」兼「男性主導」,隨住社會嘅種族多元意識提升,觀眾對小圈子選舉興趣每況愈下,於是收視年年創新低。

奧斯卡由上年開始睇得出致力改善,上年南韓電影《上流寄生族》成大贏家,今年趙婷《浪跡天地》直頭破哂紀錄,成為首位華裔女性贏得最佳導演獎項,其他獎項亦多由有色人種奪得,睇得出大會努力洗白。可惜,有78年歷史嘅金球獎面對爭議懶懶閒,而家自食惡果。

事緣由外國記者協會(HFPA)主辦嘅金球獎,最為人詬病係86位評委之中,竟然一位黑人都無,兼且流程透明度不足。協會搵哂公關Shaun Harper、律師團隊Ropes & Gray幫手承諾改革,增加黑人評委,但係仲未落實,公關團隊就劈炮唔做。連本身幫金球獎做緊危機管理嘅Smith & Co.都終止合作關係,皆因協會被爆開會無準備,仲根本無心正視問題。

輕視指責又唔回應,幾權威都有後果!轉播金球獎嘅NBC電視台,美國星期一早上宣佈2022年停止轉播金球獎。聲明指出明白HFPA改革需要時間,所以2022年將會暫停轉播,期待2023年有機會再次合作,都幾直接咁表示金球獎唔改革就停止合作,意味HFPA損失至少6000萬美元轉播收入!

咁都未完,NBC之外,電影出品公司亦群起杯葛。串流平台龍頭、提名常客Netflix、Amazon及華納等發聲明指大會有歧視、恐同問題,又經常要求特殊待遇,宣布齊齊杯葛金球獎,直至大會直視問題進行改革為止。

最慘係荷里活影星都唔撐,「黑寡婦」Scarlett Johanson多次批評協會記招發問性別歧視問題,評審言語性騷擾佢但協會無處理等,所以唔再出席金球獎記招活動。「變型俠醫」Mark Ruffalo就話攞到金球獎都唔開心亦唔自豪!

《職業特攻隊》巨星湯告魯斯仲直接,用行動証明立場。佢分別憑《生於7月4日》(1989年)、《甜心先生》(1996年)及《人生交叉剔》(1999年)贏得金球獎,NBC聲明出咗唔夠一個鐘,湯告魯斯決定退返3個獎盃俾HFPA!

由幕前到幕後都唔撐金球獎,如果協會仲唔痛定思痛大力改革,怕且呢個頒獎禮幾老牌都無得留低!

更多電影文章

【電影LOL】玉女Lily James演90年代波神 還原荷里活明星性愛片流出事件

【電影LOL】Ironman羅拔唐尼倒戈幫DC開新戲《鹿角男孩》 竟然係暗黑版《小鹿班比》?

【電影LOL】今期睇咩戲 《醉美的一課》《波斯密語》《奇蹟的燒肉店》《跟你老婆去旅行》《秘密訪客》《夢魘》

【電影LOL】Emily in Paris 第2季全員巴黎準備開工 女主角情歸何處?

【電影LOL】Marvel 晒冷預告片 預視未來5年MCU有咩大片 《永恆族》片段首度曝光

【電影LOL】花姐嘅男神 許光漢新片《你的婚禮》票房鍊贏張藝謀

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!