【電影LOL】花姐嘅男神 許光漢新片《你的婚禮》票房鍊贏張藝謀

能夠迷到人氣男團Mirror、Error經理人花姐嘅台灣男神許光漢有新電影《你的婚禮》推出，啱啱喺內地5．1假期檔上映，票房高開單日收人民幣1.5億成為冠軍，拋離同期上映張藝謀導演新作《懸崖之上》（單日收9000萬）！

《你的婚禮》改編自朴寶英、金英光主演嘅韓片《再見．我的初戀》，講述高中時，游泳健將周瀟齊（許光漢 飾）對轉校生尤咏慈（係呀，真係叫「游泳池」）一見鍾情。周默默守護尤，展開純潔而似有還無、離離合合嘅青澀愛情，不過後來尤不辭而別。

輾轉15年後周瀟齊出席尤咏慈嘅婚禮，為自己嘅痴情做個了結。簡單講一個「可惜不是你，陪我到最後」嘅愛情故事。韓版男主角玩美式足球，內地版改成游泳健將，大條道理叫許光漢不停除衫裸上身，仲成為套戲嘅賣點！

呢類純情電影一向有市場，表表者一定要數九把刀嘅《那些年，我們一起追過的女孩》，許光漢憑台劇《想見你》喺內地人氣爆燈，內地媒體因此睇好《你》可以收最少5億，結果亦不負眾望票房大收。

睇返內地電影網站評分，口碑相當參差，《時光網》得5.6低評分，負評多指「劇本簿弱」、「片段凌碎似睇MV」；《貓眼》卻得到8.1分好評，主要讚許光漢「少年感十足」、「許演技撐起套戲」等等，即係睇「許光漢」多過睇套戲，人氣勁到揹到幾億票房？

話說憑台片《陽光普照》、台劇《想見你》走紅嘅許光漢積極發展內地市場，就算上年內地疫情爆發，佢依然無懼前往拍攝《你》。就算之後無返內地做宣傳，佢都好勤力不停喺微博出文拍片叫大家多多支持，其經理人公司又幫佢出post「支持新彊棉」，咁識做難怪得到內地粉絲歡心！相反佢嘅facebook、IG就靜到飛起，3月之後就無出過post。

咁大反差令台灣觀眾對佢有兩極反應，分分鐘成為喺台灣紅得最快又跌得最快嘅演員。如果香港上《你的婚禮》，你又會唔會睇呢？花姐又有冇時間睇呢？

更多電影文章

【電影LOL】《正義聯盟》導演新片 Army of The Dead 一班友為咗5千萬迎戰幾萬喪屍

【電影LOL】今期睇咩戲《真．三國無雙》《金錢帝國：追虎擒龍》《是夜屍了》《在星空盡頭等你》《腿》《讀心叛變》

【電影LOL】真·三國無双 ︳日本遊戲界神人親筆信力讚「非常逼真」 關羽呂布出「無双」幾秒戲搞足1年

【電影LOL】奧斯卡賽後花生 趙婷點解變趙薇？頒獎禮收視跌一半 尹汝貞答記者「我唔係狗」！

【電影LOL】梁朝偉現身 《尚氣》首支預告出爐一面倒負評 網友彈劉思慕唔靚仔

【電影LOL】Amazon一次過開拍5季《魔戒》劇集版 Season1成本已經36億！

【電影LOL】港式Bollywood風味 《我男友係好差》未上畫已攞獎

【電影LOL】蜘蛛仔Tom Holland演《24個比利》網劇 挑戰人格分裂角色

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！