【電影LOL】奧斯卡賽後花生 趙婷點解變趙薇？頒獎禮收視跌一半 尹汝貞答記者「我唔係狗」！

第93屆奧斯卡金像獎完滿結束，雖然代表香港出戰最佳國際電影嘅《少年的你》，以及競逐最佳紀錄短片、紀錄香港前年反修例風波嘅《不割席》都失落獎項，不過贏得最佳紀錄短片Colette導演Anthony Giacchino致詞時都有提及香港。

因為電影業界受新冠疫情影響，奧斯卡頒獎禮由慣常2月延至4月舉行。為配合防疫措施而無哂任何表演環節，結果今年收視創新低，初步報告指收睇嘅目標觀眾（18－49歲）由往年2364萬人大跌至985萬人，足足跌咗58％！不過又唔係得奧斯卡收視慘烈，其他大show好似格林美音樂大獎及金球獎，收視一樣跌超過一半！

今年頒獎禮穩陣兼平淡，不過一樣有嘢鬧！話說奧斯卡自1972年起以頒發「最佳電影」為頒獎禮壓軸，今年將「最佳男主角」留喺最後先頒，明眼人都知道想用已故影星Chadwick Boseman (《藍調天后》)獲獎然後由佢遺孀致辭製造高潮！

結果影帝由《爸爸可否不要老》嘅Anthony Hopkins獲得，老人家無出席之餘連遙距連線都無搞，公布完結果及講埋大會代表領獎後立即完show，突兀到爆！難睇之餘仲因此被喪插抽Boseman水，引來一片負評！

成個show最活潑一刻應該係憑《農情家園》奪得最佳女配角嘅南韓女演員尹汝貞，作為縱橫韓國演藝圈多年嘅大前輩，去到美國奧斯卡一樣從容不迫，調戲《農》老闆Brad Pitt仲串佢。會後被記者追問Brad Pitt香唔香，老薑講話棉裡針，幽默回應「我又唔係狗，無聞佢喎」一句KO無謂提問！去人地地頭，又真係唔駛卑躬屈膝嘅！

華人導演趙婷憑《浪跡天地》(Nomadland) 奪得「最佳電影」、「最佳導演」，成為首位亞裔及第2位女性導演獲呢個獎項，締造歷史！以往如果有任何華人攞奧斯卡，唔理佢咩國藉、識唔識中文甚至無踏足過亞洲，總之有中國人血統，都會被中國內地自動收編成為「華人之光」大肆表揚。

趙婷中國出世，父母都仲喺大陸，上台仲有用普通話講「人之初 性本善」幾咁影響佢價值觀，內地官媒竟然無大鑼大鼓？零報導唔尋常到連外媒The Hollywood Reporter都留意到，仲深入淺出一文寫出來龍去脈俾英文讀者知。

《浪》原訂今年4月內地公映，年初電影宣傳不時見到「華人之光」兼得到官方力撐，不過因為一個幾年前澳洲訪問嘅筆誤，將趙婷所講嘅「美國不是我的國家」（American is not my country）變成「美國現在是我的國家」（American is now my country）被網民圍攻成為賣國賊，「趙婷」2個字變咗404！

話哂贏奧斯卡大獎，內地網民又轉風向，微博、微信有大量「恭喜」、「戲好睇」之類嘅貼文，同電影相關嘅帳號都有出奧斯卡賽果。不過為咗貼文唔會被消失，趙婷被改名成為「那個女孩」、「趙雅芝」、「趙薇」、「趙又婷」等，睇文睇到猜謎語咁！

更多電影文章

【電影LOL】今期睇咩戲 《超犀女王》《農情家園》《毒水曝光》《上流假丈》《玩命招魂夜》《刺殺小說家》

【電影LOL】梁朝偉現身 《尚氣》首支預告出爐一面倒負評 網友彈劉思慕唔靚仔

【電影LOL】Amazon一次過開拍5季《魔戒》劇集版 Season1成本已經36億！

【電影LOL】港式Bollywood風味 《我男友係好差》未上畫已攞獎

【電影LOL】蜘蛛仔Tom Holland演《24個比利》網劇 挑戰人格分裂角色

【電影LOL】男人的浪漫！荷里活拍《機動戰士高達》真人版 伏味濃濃地

【電影LOL】院線搞重溫港產片活動 冇得睇《風再起時》不如睇《五億探長雷洛傳》

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！