【電影LOL】院線搞重溫港產片活動 冇得睇《風再起時》不如睇《五億探長雷洛傳》

【電影LOL】院線搞重溫港產片活動 冇得睇《風再起時》不如睇《五億探長雷洛傳》

經過一年戲院又開又閂,電影片期改完又改,疫情下可以入戲院變成難事,真係要好好珍惜。荷里活大片受疫情重創,片期大亂反而造就機會俾其他類型片種,商業片以外仲有好多選擇,特別對本土作品嘅支持,絕對係近年新高!

80、90年代港產片成績驕人,紅遍東南亞影響力深遠,今時今日我咃仍然喺南韓電影搵到大量港產片元素,連現正上映,破哂票房紀錄狂收62億票房嘅內地電影《你好!李煥英》都有大量港產片、香港流行曲穿插其中!新片睇得多,反而想睇返90年代原裝港產片,嘉禾院線搞咗個「好想瘋狂睇港產片」系列,片單幾吸引!

「好想瘋狂睇港產片」頭炮係上年5月重映愛情經典,林愛華執導、陳奕迅同張柏芝主演嘅《十二夜》。事隔一年終於再有猛片推出,今次唔談情,轉陣俾喜劇同警探片你睇!今次一口氣重映5部分別由周星馳及劉德華主演嘅電影,包括《九品芝麻官》、《賭俠》、《賭俠 II 之上海灘賭聖》、《五億探長雷洛傳雷老虎》及《五億探長雷洛傳 II 之父子情仇》。

90年代港產片一定要數「賭」系列,因為周潤發主演嘅《賭神》大受歡迎,開創電影新類型。先有喜劇版「賭神」《賭聖》嘅出現,「三叔」、「綺夢」、「特異功能」等大熱成為香港流行文化一部份,周星馳及劉德華首次合作嘅《賭俠》就係《賭神》及《賭聖》混合體,仲要只係遲《賭聖》4個月上映,可見當年港產片需求有幾大,製作又幾快,《賭俠》票房一樣大收,成為當年票房亞軍!

重映嘅仲有由劉德華主演、劉國昌導演嘅《五億探長雷洛傳雷老虎》,電影以香港四大探長中嘅呂樂為原型,不過因為加插太多與事實不負嘅情節先改名做「雷洛」!續集《父子情仇》有另一天王郭富城主演,戲中飾演劉德華個仔兼廉署人員雷用賢,因為雷洛感情生活混亂,雷用賢入廉署就係為咗拉自己老豆報仇,最後父子冰釋前嫌!

【電影LOL】院線搞重溫港產片活動 冇得睇《風再起時》不如睇《五億探長雷洛傳》
【電影LOL】院線搞重溫港產片活動 冇得睇《風再起時》不如睇《五億探長雷洛傳》

電影原型呂樂探長當年為罪案剋星,黑白兩道俾足面,同時收賄亦唔手軟,身家同份糧完全唔合比例,所以得到「五億探長」名號,後來為咗逃避廉署調查,成家連夜潛逃台灣!

當年港產片都有唔少以探長或江湖大佬做原型嘅電影,好似《跛豪》或者今次重映嘅《五億探長雷洛傳》,人物原型生平夠哂層次又多道德踩界位,拍成電影夠哂Juicy!以今時今日嘅審批標準,人物傳記都要政治正確,《雷洛傳》可一不可再。

【電影LOL】院線搞重溫港產片活動 冇得睇《風再起時》不如睇《五億探長雷洛傳》
【電影LOL】院線搞重溫港產片活動 冇得睇《風再起時》不如睇《五億探長雷洛傳》

今年香港電影國際展開幕電影《風再起時》都以呂樂為原型,由郭富城做「磊樂」,不過最後因為「技術問題」臨時取消放映。暫時睇住1991年版「雷洛」先?

更多電影文章

【電影LOL】《飛天小女警》真人劇集造型照曝光嚇親網民 靠故事+班底拯救童年回憶

【電影LOL】今期睇咩戲 《爸爸可否不要老》《你好,李煥英》《銀魂 The Final》《真人快打》

【電影LOL】《神探白朗》刀仔鋸大樹成功 Netflix35億天價截糊搶播放權

【電影LOL】派拉蒙寫定劇本準備重拍《珠光寶氣》惹官非 隨時要賠3.9億

【電影LOL】哥哥張國榮逝世18年 南韓戲院重映作品兼出精美週邊 香港嘉禾戲院播《色情男女》

【電影LOL】真正最佳男配角 廖啟智經典之作回顧

【電影LOL】真熊真事改編 《白粉熊》拆解森林黑熊吸毒過量死之謎

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!