【電影LOL】《飛天小女警》真人劇集造型照曝光嚇親網民 靠故事+班底拯救童年回憶

舊年8月華納宣佈旗下CW電視將會製作動畫《飛天小女警》(The Powerpuff Girls)真人劇集,當時消息一出反應兩極。動畫《飛》於1998年首播,以3個小女孩花花、毛毛及泡泡化身超級英雄鋤強扶弱、打撃罪案,可愛嘅造型加上高超能力極受小朋友歡迎!

劇集消息一出,網民最擔心真人版會摧毀童年回憶︰如果拍返小朋友版,作為合家歡節目都無咁擔心,偏偏真人版劇集無意以兒童為目標,轉而主打成人觀眾,將故事推到20年後,講述花花、泡泡、毛毛長大成人,已經 20幾歲嘅佢地後悔打撃罪行而無咗童年 ,偏偏此刻世界極需要佢地拯救,3人會否為咗大眾安全再次攜手打擊惡勢力?

根據外媒Variety報導,劇集會著墨「小女警」嘅心理掙扎,好似花花因為做超級英雄經歷而有創傷後遺,成年後經常焦慮不安;毛毛用盡辦法隱瞞「飛天小女警」嘅身份,努力做個平凡普通人!而本來想做明星嘅泡泡,發掘自己內心深處,先知自己鍾情救人多過名氣!

網民原本對於劇集由「小女警」變成「大女警」,擔心童年回憶被破壞,不過隨住台前幕後班底公布,由《Juno少女孕記》編劇Diablo Cody執筆、《抱抱我的初戀》Greg Berlanti、《詸飛空姐》Erika Kennair做監制,加埋曾執導《河谷鎮》嘅Maggie Kiley做導演,似乎值得期待。

主角則由《神盾局特工》女主角汪可盈(Chloe Bennet)飾演女主角花花、迪士尼童星主演《繼承大丈夫》嘅Dove Cameron飾演泡泡,有豐富百老匯舞台演出經驗嘅Yana Perrault則飾演毛毛,幾位年輕演員有外型有實力,即刻對真人劇集信心大增!

不過剛剛劇組首次公布拍攝花絮,當中幾位「飛天女警」嘅造型嚇壞網友,照片中3位女主角分別穿著單色「令面」背心短裙,汪可盈一頭啡髮配上紅蝴蝶結似足假髮,加埋一人一對及膝長襪,似足網購貨不對辦廉價cosplay,分分鐘萬聖節扮鬼扮馬都無咁hea!

既然故事設定於成年後,有心發掘幾位女警心理變化,造型服飾又真係無需要跟足動畫小女孩版本……邊有20歲女紮住大大個蝴蝶結周圍走?如果話係制服又好牽強!希望個look係gimmick,唔係真實造型啦,「飛天小女警」真人版啲衫咁普通,真係好難有興趣睇!

更多電影文章

【電影LOL】今期睇咩戲 《爸爸可否不要老》《你好,李煥英》《銀魂 The Final》《真人快打》

【電影LOL】《神探白朗》刀仔鋸大樹成功 Netflix35億天價截糊搶播放權

【電影LOL】派拉蒙寫定劇本準備重拍《珠光寶氣》惹官非 隨時要賠3.9億

【電影LOL】哥哥張國榮逝世18年 南韓戲院重映作品兼出精美週邊 香港嘉禾戲院播《色情男女》

【電影LOL】真正最佳男配角 廖啟智經典之作回顧

【電影LOL】真熊真事改編 《白粉熊》拆解森林黑熊吸毒過量死之謎

【電影LOL】空肚講燒肉!土屋太鳳新片《奇蹟的燒肉店》帶你去日本食好西

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!