【電影LOL】真正最佳男配角 廖啟智經典之作回顧

·2 分鐘文章
【電影LOL】真正最佳男配角 廖啟智經典之作回顧
【電影LOL】真正最佳男配角 廖啟智經典之作回顧

活躍幕前超過40年嘅廖啟智因癌症逝世,終年66歲。喺電視台出身嘅智叔,歷年都參與過唔少電影演出,作品接近90部,8度提名香港電影金像獎最佳男配角,並且兩度獲獎,堪稱香港影圈真正最佳男配角!近年智叔喺浸大電影學院出任講師教導表演技巧,以另一種身份為演藝界作出貢獻。

1980年代開始接拍電影嘅智叔,初期作品唔算多,1992年張之亮導演作品、講述籠屋生活嘅《籠民》,搵智叔演繹智障人士「太子森」一角,喺1993年嘅第12屆香港電影金像獎,力壓吳鎮宇、梁朝偉、黃秋生及甄子丹贏得最佳男配角,成功拿下演藝生涯第一項主要獎座。

《籠民》電影截圖
《籠民》電影截圖

之後智叔不時參與電影演出,喺《無間道II 》飾演吳鎮宇嘅三叔,雖然戲份唔算多,但係戲中佢殺完人埋屍之後,居然拎個口琴出嚟吹奏Auld Lang Syne,以另一種手法顯出角色冷血性格。據導演麥兆輝所講,呢個設計係智叔提議,導演拍晒2個版本之後,最終決定用吹口琴版本。智叔亦憑《無間道II 》獲提名金像獎最佳男配角。

離開大台之後智叔更活躍於影圈,作品數量大增,2007年《門徒》演角色名都冇嘅海關督察,為咗爭功同警方爭食,結果行動期間出事,嗰場戲睇到心驚膽跳!2008年拍林超賢作品《証人》演繹佢最擅長嘅老差骨角色,演出得心應手,為智叔再度贏得最佳男配角名銜。

智叔於《無雙》演偽鈔集團電版師傅
智叔於《無雙》演偽鈔集團電版師傅

智叔近年再憑《點五步》及《無雙》兩度獲提名,《點》中所演的校長全心投入創立棒球隊,對隊員喊出「冇講過要你地贏,但係我有講過叫你地唔好放棄」,令觀眾感受到箇中熱血。而備受爭議嘅《十年》,智叔亦有份演出其中一個單元《本地蛋》,佢喺戲中同小朋友講「千祈唔好慣,就係因為我地乜都慣晒,先搞到你地咁」,可謂發人深省。

更多電影文章

【電影LOL】真熊真事改編 《白粉熊》拆解森林黑熊吸毒過量死之謎

【電影LOL】空肚講燒肉!土屋太鳳新片《奇蹟的燒肉店》帶你去日本食好西

【電影LOL】今個星期睇咩戲《哥斯拉大戰金剛》《約定的夢幻島》《悲傷路上還友你》《午夜諜變》《複身犯》

【電影LOL】奇洛李維斯創作漫畫BRZRKR大賣 Netflix扑鎚拍成電影搵奇哥孭飛

【電影LOL】內地翻拍《秋田犬八千》八千變八筒 網友mean問︰馮小剛演八公?

【電影LOL】唔係《12夜》續集 《12日》敲定鄧麗欣馬志威主演

【電影LOL】《尋秦記》電影版預告 影視展率先曝光 古天樂旗下天下一超多新作

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!