【電影LOL】空肚講燒肉!土屋太鳳新片《奇蹟的燒肉店》帶你去日本食好西

飲飲食食最好睇,日本著名搞笑組合「 鴕鳥俱樂部 」成員寺門義人就拍咗套以「燒肉」做主角嘅電影《奇蹟的燒肉店》,由近期因劇集《今際之國的闖關者》人氣急升嘅土屋太鳳及組合EXILE成員NAOTO主演。

故事講述佐藤良人(NAOTO飾)嘅媽媽安江,一人打理下町燒肉店「根岸苑」,生意不俗仲為良人打開燒肉嘅大門,每日最期待媽媽愛嘅手藝!可惜因為美食評論家嘅不失報導,令燒肉店生意一落千丈,最後被逼執笠,成年嘅良人同媽媽亦開始漸行漸遠。

成為自由寫手嘅良人一日受到網站編輯靜香(土屋太鳳飾)邀稿,要為美食情報網寫大量食評,首個主題係「燒肉」!良人同靜香因此走訪多間燒肉店做資料搜集,母親授予嘅燒肉知識逐漸解封。同一時間,因為母親過世,良人決定尋回母親嘅味道,再次燒出「根岸苑」美名!

《奇蹟的燒肉店》加入導演寺田親身經歷,以燒肉講母子情,人與人相處離唔開食,燒肉過程見盡悲歡離合。電影獲得唔少日本藝人推薦,連型男廚神速水直道同氣志團嘅綾小路翔都讚好!

電影除咗土屋太鳳及NAOTO主演,仲請嚟日劇常客《反轉三國志》大泉洋、《相捧》松尾諭、《救命病棟24小時》石黑賢及《走佬花嫁殺人事件》寺脇康文等演出。

導演寺門一向識飲識食,對燒肉相當講究,既然以「燒肉」為題材,電影當然有大量燒肉場面,單係唔同位置嘅牛肉多達12款之多,由常見嘅牛五花、厚切牛舌到牛內臟拼盤、橫隔膜肉都有,似足燒肉教材!

電影嘅日本官網亦非常配合電影主題,整到燒肉店menu咁超多「肉照」,無論網站或電影都不宜空肚觀賞,因為越睇越肚餓!《奇》香港暫定5月有得睇,未有得去日本旅行之前,可以睇住《奇》止止癮,順便學定烤肉秘技,將來有機會重遊日本就可以一展所學!

更多電影文章

【電影LOL】奇洛李維斯創作漫畫BRZRKR大賣 Netflix扑鎚拍成電影搵奇哥孭飛

【電影LOL】內地翻拍《秋田犬八千》八千變八筒 網友mean問︰馮小剛演八公?

【電影LOL】唔係《12夜》續集 《12日》敲定鄧麗欣馬志威主演

【電影LOL】今個星期睇咩戲 《小飛俠與愛麗絲:魔幻奇緣》《呃love天團》《末世戰疫》《入住兇宅請敲門》

【電影LOL】《尋秦記》電影版預告 影視展率先曝光 古天樂旗下天下一超多新作

【電影LOL】奧斯卡提名公布 《少年的你》爭國際電影獎 《Do Not Split不割席》入圍最佳紀錄短片

【電影LOL】Hello Kitty進軍荷里活大電影 搵動畫界高手撐起編導

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!