【電影LOL】哥哥張國榮逝世18年 南韓戲院重映作品兼出精美週邊 香港嘉禾戲院播《色情男女》

·2 分鐘文章

哥哥張國榮離開我哋18年,影迷、歌迷對佢思念不滅,喺崩壞、充滿不安嘅時代,特別懷念巨星風釆。南韓有大量哥哥fans,每年都會舉辦紀念活動,今年韓國CGV院線特別以「星」為題舉辦張國榮作品展,於全國戲院分別上映《阿飛正傳》、《春光乍洩》、《星月童話》、《英雄本色》、《英雄本色2》等5部作品。

南韓CGV院線推出紀念週邊
南韓CGV院線推出紀念週邊

CGV更特別推出結集《霸王別姬》劇照嘅寫真集作為活動週邊,非常有心。可惜香港CGV戲院無參加是次紀念活動,香港觀眾同特別版寫真集無緣!不過,香港嘉禾戲院今年都有搞特別放映,推出「念張國榮」活動,於4月1日重映1996年作品《色情男女》。

《色》由羅志良、爾冬陞導演執導,當年打正「三級片」旗號噱頭十足,不過既然由哥哥張國榮主演,心水清嘅觀眾當然知《色》唔係咸片。故事講述哥哥飾演嘅新進導演阿星作品票房失利,無戲拍感到前路茫茫,忽然獲得一個機會拍攝一部低俗題材的商業片,指定由老闆女友夢嬌(舒淇 飾)做女主角、華叔(徐錦江 飾)做男主角,星於商業及藝術之間掙扎,抗拒老闆唔合理的要求,片場工作人員又各有要求同問題,令星十分頭痛!

在好友監製阿虫(羅家英 飾)的幫忙下,準備開戲.幾組戲拍下來,監製對毛片不滿,令星失落和意志消沈,後得到女友May(莫文蔚 飾)及熱愛電影嘅偉鼓勵,終於收拾心情,重新開展工作。雖然一波三折,不過星嘅熱誠最於感染眾人,拍出商業藝術兼備嘅作品!

哥哥唔止飾演導演阿星咁簡單,戲中阿星導演嘅場面由張國榮親自構思度位,連鏡頭點擺,剪接、配樂都一手包辦,銀幕上2分鐘嘅毛片片段,係哥哥用咗7個鐘頭完成嘅作品,真係全心投入阿星一角!哥哥演戲一向投入,《色》中有幾場裸露情慾戲,正因為哥哥嘅投入,就算係床上戲都非常自然,好有美感!

張國榮憑《色》提名第16屆香港電影金像獎最佳男主角,雖然無緣寶座,不過無可否認哥哥嘅演出令電影更精彩。哥哥,好掛住你呀!

更多電影文章

【電影LOL】真正最佳男配角 廖啟智經典之作回顧

【電影LOL】真熊真事改編 《白粉熊》拆解森林黑熊吸毒過量死之謎

【電影LOL】空肚講燒肉!土屋太鳳新片《奇蹟的燒肉店》帶你去日本食好西

【電影LOL】今個星期睇咩戲《哥斯拉大戰金剛》《約定的夢幻島》《悲傷路上還友你》《午夜諜變》《複身犯》

【電影LOL】奇洛李維斯創作漫畫BRZRKR大賣 Netflix扑鎚拍成電影搵奇哥孭飛

【電影LOL】內地翻拍《秋田犬八千》八千變八筒 網友mean問︰馮小剛演八公?

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能