【電影LOL】蜘蛛仔Tom Holland演《24個比利》網劇 挑戰人格分裂角色

就快25歲嘅英國男演員「蜘蛛仔」Tom Holland，2016年出道冇耐就接到新一代蜘蛛俠嘅角色，自此片約不斷，剩係《蜘蛛俠》同埋《復仇者聯盟》兩邊走都夠佢忙，早排Tom仔話要抖一抖，但係後生仔邊有咁易停落嚟！最新消息係話Tom Holland將會接拍Apple TV＋嘅劇集The Crowded Room第一季。

今次可以話係Tom仔演技考牌之作，因為劇集改編自著名小說《24個比利》（The Minds of Billy Milligan），故事主人翁 Billy Milligan係美國首位因為患上多重人格分裂（DSM)，而獲得脫罪嘅被告。1970年代，Billy Milligan干犯多宗強姦、行劫及綁架罪行，但係喺1977年嘅審訊期間，有心理學家判斷Billy有DSM，所以犯案時神智示清，而呢個說法亦獲得多位專家同意，法庭最終判Billy無罪，但係要接受精神治療。作家Daniel Keyes將Billy嘅故事寫成傳記小說，提到Billy嘅人格分裂成24個個體，有小女孩、紳士、暴躁男、工作狂、喜劇演員，個個各有設定。

單係睇Billy Milligan嘅故事都估到個角色有幾難演，亦都因此明白點解要接呢套劇，作為佢打入美國網路串流平台嘅頭炮。早年James McAvoy主演嘅《思．裂》(Split)，角色同樣有23重人格分裂，James嘅演出由頭帶到尾，外界對佢評價相當唔錯。既然珠玉在前，今次有機會演呢類高難度角色，Tom仔梗係拿拿聲接啦。而佢早前上畫嘅新戲Cherry，演一個有創傷後遺症嘅濫藥退伍軍人，為咗生活要打劫銀行，可以話係拍The Crowded Room前嘅熱身之作。

The Crowded Room劇本會由《有你終生美麗》編劇Akiva Goldsman執筆，並會同原著作者Daniel Keyes一齊出任監製，暫時未知幾時有得睇。

更多電影文章

【電影LOL】男人的浪漫！荷里活拍《機動戰士高達》真人版 伏味濃濃地

【電影LOL】院線搞重溫港產片活動 冇得睇《風再起時》不如睇《五億探長雷洛傳》

【電影LOL】《飛天小女警》真人劇集造型照曝光嚇親網民 靠故事＋班底拯救童年回憶

【電影LOL】今期睇咩戲 《爸爸可否不要老》《你好，李煥英》《銀魂 The Final》《真人快打》

【電影LOL】《神探白朗》刀仔鋸大樹成功 Netflix35億天價截糊搶播放權

【電影LOL】派拉蒙寫定劇本準備重拍《珠光寶氣》惹官非 隨時要賠3.9億

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！