【電影LOL】男人的浪漫!荷里活拍《機動戰士高達》真人版 伏味濃濃地

·2 分鐘文章

日本又一套動漫改編真人電影!

早於2018年日本Sunrise動畫就「高達40週年」於美國Anime Expo 2018活動中公布過開拍真人電影計劃,等足2年終於有新進展,剛剛傳奇影業及串流平台Netflix宣布同Sunrise合作,即將開拍《機動戰士高達》真人版(live action)電影,並由《金剛 : 骷髏島》導演Jordan Vogt-Roberts執導,聯同《POKÉMON 神探Pikachu》Cale Boyter共同監制!

《高達》自1979年推出以來,40年來故事發展出多條副線,Sunrise自己出嘅動畫電影都有「F91」、「NT」、「UC」等唔同時空,當中人物、鬥爭起源錯綜複雜,唔係忠粉都未必睇得明。真人版電影暫時未有透露故事大鋼,連相關背景都欠奉,《高達》故事要濃縮成2個鐘嘅電影都預咗會大刀闊斧,再者觀乎荷里活改編日本動漫嘅往績,故事一定會顯淺易明。

雖然計劃處於構思階段,建議高達迷唔好太大期望。荷里活拍動漫似改頭換面多過改編,基本上當全新故事睇仲好過。Sunrise喺2000年就同加拿大公司合作,為慶祝「高達20週年」推出過真人版電影G-Saviour,據聞耗資1億美金拍攝,可惜評價極差,fans們直頭當套戲無存在過!

相隔21年再次挑戰真人版,今次保証係特效畫面一定靚,傳奇影業出過《悍戰太平洋》系列,處理機械人大戰畫面經驗豐富,可以保証《高達》電影不乏刺激對戰場面及電腦特效。而Jordan Vogt-Roberts執導嘅《金剛》一樣有大量特效,怪獸大戰場面,畫面一定有睇頭。

唯一隱憂係劇情舖排,無論《悍》定《金剛》,2部大製作嘅劇情相當薄弱,尤其《金》集合有演技嘅「洛基」Tom Hiddleston、「Marvel隊長」Brie Larson及「神盾局特工Fury」Samuel L. Jackson等主演,不過無戲被佢哋做,睇得出用咗大量心力做美術及特效,可惜故事勁多犯駁位,幾位主角淪為空殼無靈魂,劇情得啖笑!

有時真係好想跪求荷里活高抬貴手,唔好再改編日漫做真人版電影,我仲未克服到《龍珠:全新進化》嘅陰影。

更多電影文章

【電影LOL】院線搞重溫港產片活動 冇得睇《風再起時》不如睇《五億探長雷洛傳》

【電影LOL】《飛天小女警》真人劇集造型照曝光嚇親網民 靠故事+班底拯救童年回憶

【電影LOL】今期睇咩戲 《爸爸可否不要老》《你好,李煥英》《銀魂 The Final》《真人快打》

【電影LOL】《神探白朗》刀仔鋸大樹成功 Netflix35億天價截糊搶播放權

【電影LOL】派拉蒙寫定劇本準備重拍《珠光寶氣》惹官非 隨時要賠3.9億

【電影LOL】哥哥張國榮逝世18年 南韓戲院重映作品兼出精美週邊 香港嘉禾戲院播《色情男女》

【電影LOL】真正最佳男配角 廖啟智經典之作回顧

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!