【電影LOL】梁朝偉現身 《尚氣》首支預告出爐一面倒負評 網友彈劉思慕唔靚仔

受新冠疫情影響,Marvel電影《尚氣與十環幫傳奇》拍攝進度多番延誤,昨晚喺男主角劉思慕32歲生日公布首個預告片,2分鐘片段一出,竟然一面倒負評!

Marvel電影係票房靈藥,套套大收,《尚氣》係漫威電影宇宙第4階段關鍵作品,加上金球影后Awkwafina、華人巨星梁朝偉、楊紫瓊以及我哋熟悉嘅陳法拉主演,點解會慘遭負評?

話說《尚氣》未拍已遭內地網民大叫罷睇,因為梁朝偉飾演嘅「滿大人」喺原著漫畫中角設為蛇頭鼠眼、心狠手辣嘅歹角,冒牌「滿大人」喺2013年《鋼鐵奇俠3》出現過,形象相當麻麻,內地指角色「辱華」,仲話要罷睇埋梁朝偉!

男主角劉思慕就呢樣爭議澄清過,指漫畫面世已經50年,電影版會與時並重,「滿大人」唔會辱華。依家預告出咗,梁朝偉角色由「滿大人」改成「文武」,著住西裝嘅造型亦相當養眼,不過內地網民一於懶理,繼續聲稱罷睇!

另一負評集中於劉思慕嘅長相,「路人甲」、「唔靚仔」、「符合歐美審美嘅樣」,有人改圖話佢似習近平主席,又話梁朝偉似主角多啲,評價要幾mean有幾mean!其實劉幾設合「尚氣」角色,如果角色變咗彭于晏或者姜濤做,好難相信佢可以隱姓埋名10年避過老豆文武嘅追蹤,肯定大把人偷拍擺上網囉,咁靚仔。

Marvel電影舖排多年,選角又點會求其?華裔演員又咁多,㨂得無知名度、只係拍過加拿大CBC電視台劇集《金氏便利店》(Kim's Convenience)嘅劉思慕一定有原因,至少佢個爆肌身型絕對合格!

其實電影選角爭議一向都有,之前宣布由Brie Larson做「Marvel隊長」時一樣被負評「大媽隊長」;又或者多年前仲係名不見經傳嘅Daniel Craig,接任成為新一代「占士邦」又係負評不斷,結果Daniel Craig嘅007好睇到不得了,當年「樣衰」變成今日嘅「男人味十足」、「型佬」。話唔定睇完《尚》,觀眾會對劉思慕改觀。其實剩係梁朝偉拍商業科幻動作片都夠吸引力啦。

《尚氣》預定今年9月上映,到時就知Marvel功力有無跌watt。我更好奇屆時內地票房成績……Marvel喎,係咪真係罷睇先?

更多電影文章

【電影LOL】Amazon一次過開拍5季《魔戒》劇集版 Season1成本已經36億!

【電影LOL】今期睇咩戲《二次人生》《複製人徐福》《浪浪歷險記》《幪面超人 劇場版》《等一個擁抱》

【電影LOL】港式Bollywood風味 《我男友係好差》未上畫已攞獎

【電影LOL】蜘蛛仔Tom Holland演《24個比利》網劇 挑戰人格分裂角色

【電影LOL】男人的浪漫!荷里活拍《機動戰士高達》真人版 伏味濃濃地

【電影LOL】院線搞重溫港產片活動 冇得睇《風再起時》不如睇《五億探長雷洛傳》

【電影LOL】《飛天小女警》真人劇集造型照曝光嚇親網民 靠故事+班底拯救童年回憶

【電影LOL】《神探白朗》刀仔鋸大樹成功 Netflix35億天價截糊搶播放權

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!