傅穎40歲生日宣布改名解釋箇中原因 貼與Miki慶生世紀合照

傅穎（Theresa）昨日（22日）踏入40歲生日，於社交平台分享小時候舊照和抱著貓貓嘅照片，宣布進入人生下半場，向前半生講再見並去舊立新，將「傅穎」改名成「傅寶誼」。另外，Theresa於IG限時動態PO出多張與朋友嘅慶生照，當中竟然見到久未合體嘅前隊友楊愛瑾（Miki）。

Theresa於帖文表示帶住爺爺嘅期許演譯前半生，人生下半場則希望帶著自己嘅期許前進：「從今天起，我是傅寶誼」，並解釋「寶誼」嘅意思：「相較於聰穎與否，我更希望以一份禮物的形式出現在別人的生命中，取名寶；對自己的心念及行為更加規範，取名誼」。Theresa又表示，名字只係一個外在符號，內在先係一切嘅根本，同時指：「人生無論幾歲，都要有去舊立新的勇氣，活成自己喜歡的模樣」。

Theresa於2002年以9人女子組合Cookies出道，翌年Cookies改組由9人變4人，由Theresa與鄧麗欣（Stephy）、吳雨霏（Kary）和楊愛瑾（Miki）組成Mini Cookies，不過由組團到解散，Theresa與隊友屢傳不和，於多年來各Cookies成員嘅聚會合照中都未曾見過Theresa嘅身影。Theresa亦曾於社交平台發文直認與Cookies成員曾不和，指當年曾被排擠，不過一切都已經過去，坦言好多年無聯繫，希望各成員都幸福安好：「是的，我們曾不和，現在也不熟，可我們不是敵人。」其中，Theresa與Stephy於2019年被發現疑似世紀破冰，Stephy當時接受媒體訪問指與Theresa只係無聯絡，咁啱喺鄭秀文演唱會見返再交換返電話聯絡及互相追蹤社交平台，及後Theresa又於IG限時動態PO出Stephy送畀佢嘅中秋賀禮，至今仍見Stephy不時都會於Theresa帖文按讚。近日，Theresa大曬與朋友嘅慶生照，從其中一張三人合照見到Cookies另一成員Miki為佢慶生，Theresa更於照片中留下3個心心Emoji。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！