朱千雪風騷晒鑽戒 讚求婚誠意十足

女神朱千雪前日31歲生日宣布婚訊，即將成為人妻的她昨日戴着閃爆求婚鑽戒陪媽咪飲茶。問到醫生男友Justin的求婚過程，千雪表示開心又緊張，當時完全不懂反應，大讚夠晒誠意！

朱千雪前日宣布與拍拖5年的醫生男友吳昆倫（Justin）結婚，並已在港入紙申請註冊，快將榮升吳太的她，昨日做孝順女親親媽咪。下午1時半，她駕車載媽咪到灣仔一間潮州酒家飲茶，朱母先行落車，身穿碎花短裙的千雪，左手戴着閃爆求婚鑽戒現身，記者隨即上前恭喜，笑容滿面的她大方接受訪問。

摸肚仔話未有BB

問到辦好嫁妝未？她說：「未呀！」再問是否雙喜臨門有BB？她摸摸肚笑言：「唔係呀！我仲咁瘦。（未婚夫會唔會陪未來岳母飲茶呀？）佢唔嚟呀！」原本打算先去酒樓攞位的朱母，亦應邀停下來與女兒合照。

個多小時後，兩母女歎完茶離開，由於從冷氣地方走出戶外，朱母的眼鏡即時霧化，二人合照變得十分搞笑！期間記者着千雪騷鑽戒拍照，她一臉尷尬，但仍有求必應。問到婚禮籌備進度？她說：「所有嘢都仲Plan緊。（唔會喺香港擺酒？）睇吓點啦，未諗到咁遠。（有日子未？）未有，Plan緊，之前入紙之嘛！我哋之後會喺律師樓簽字，簡單處理。」據知，有傳他們將於8月結婚。

發文多謝岑杏賢

記者再追問Justin求婚時可有跪地？千雪甜笑說：「總之有誠意啦！唔講咁多。（有冇喊？）冇喊，但緊張，我唔識反應，但好開心。」受訪完畢她便取車離開，先送媽咪到銅鑼灣，再駕車返回小西灣寓所。此外，千雪在社交網發文多謝好友岑杏賢特意飛到愛爾蘭送上結婚賀禮，為他們操刀影相。