網民列出香港十大男神 MIRROR全員未入榜 公認靚仔吳彥祖只排第9

近日討論度較高嘅話題必然係MIRROR成員姜濤、江𤒹生（Anson Kong）、盧瀚霆（Anson Lo）、呂爵安（Edan）、陳卓賢（Ian）、柳應廷（Jer）及李駿傑（Jeremy）有份入圍「全球百大俊男2022」，鏡粉們都好替佢哋開心；不過對於一班討論區網民而言，又有邊個能擔任香港男神呢？網民嚴選出十大香港男神，一向公認靚仔嘅吳彥祖當然榜上有名，不過竟然只排第9位，不如一齊睇睇結果，唔知當中又有無你心水呢？

第10位：陳冠希
陳冠希當年出道集「型英帥靚正」於一身，加上識得著潮牌打扮，迷倒一眾少女，不過近年狀態不復當年，試過喺IG開Live時被網民發現臉上魚尾紋、雀斑及鬚根盡現，又指陳冠希肥咗兼M字禿，驚變中年大叔。

第9位：吳彥祖
吳彥祖憑俊俏外表及結實身材擄獲大量少女心，加上與Lisa S.相戀8年結婚，不時大曬滲透滿滿幸福感嘅生活照，認真係長情好男人；但近年亦被網民指，吳彥祖出現禿頭現象，額頭似發光一樣。

第8位：謝霆鋒
謝霆鋒一向chok到盡頭，好少會畀人影到佢唔型嘅一面；廚藝了得嘅佢仲畀人話連煮嘢食嗰陣都keep住chok樣，簡直係零死角男神。即使現年41歲，但外表猶如凍齡一樣。

第7位：鄭伊健
相信鄭伊健所拍攝嘅陽光檸檬茶廣告無人不曉，當年一個靦腆笑容風靡萬千少女；而佢亦留住唔係人人都駕馭到嘅長髮，被指係最有型嘅長髮男神。

第6位：古天樂
古天樂初出道時皮膚白滑，後來曬黑咗就多咗份男人味，但無論年輕時期定係而家顏值都相當高，佢就曾經分享呢十幾年除咗做運動，每日只會食一餐以保持體態；而古天樂亦熱衷慈善，2008年成立古天樂慈善基金幫助有需要嘅人，如內地捐錢建小學，近日又向慈善社福機構捐出新冠病毒快速檢測套裝，絕對係真男神。

第5位：郭富城
「四大天王」郭富城初出道時以濃眉大眼及舞技出色聞名，《唱這歌》、《狂野之城》、《一變傾城》等歌曲都令人印象深刻，56歲嘅郭富城外表上無太大變化，仲越老越靚仔，但曾被網民批評衣著打扮似大叔，娘味極濃咁話。

第4位：黎明
黎明斯文俊俏形象深入民心，仲係第一代情歌王子；去年TVB重播1994年劇集《阿Sir早晨》，觀眾重看當年僅得28歲嘅黎明驚歎好靚仔之餘，仲話對比宜家無咩點變，絕對稱得上係不老男神。

第3位：周潤發
周潤發演技出眾，1986年《英雄本色》「Mark哥」一角令人印象深刻；加上親民個性得到觀眾喜愛，近年不少市民行山撞到發哥，邀請發哥合照，佢都好大方合影，相當平易近人。

第2位：梁朝偉
梁朝偉與劉德華、黃日華、苗僑偉、湯鎮業有「無綫五虎將」之稱，當年除咗憑一雙電眼吸引觀眾，演技亦有一定實力，憑《重慶森林》警察633一角囊括金馬獎及金像獎影帝寶座。

第1位：張國榮
張國榮當年參加麗的電視亞洲業餘歌手大賽奪冠入行，顏值擔當、動人歌聲及電影作品吸引眾多女生追捧；但2003年4月1日選擇留下遺書結束短短46年生命，不過每年哥哥死忌，都有唔少粉絲悼念。而愛人唐鶴德亦會於社交平台貼出與哥哥嘅合照，可謂活在世人心中。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！