疑似何太抖音帳戶曝光 曾拍片教女生嫁個有錢人 留言確認何伯勁過後生仔？

《東張西望》令何伯何太成為新聞人物，但係當事人似乎冇被鋪天蓋地嘅討論嚇怕，連日來不時有網民喺街上野生捕獲疑似何伯何太，間接令「蒙著咀說愛你」嘅兩位真樣曝光。最新發展係有網民搵到疑似何太抖音帳戶，佢仲教姊妹們做女人嘅人生道理。

網民搵到嘅帳戶有2個，其中一個名稱包含「千語BB」，唔知係咪疑似何太想好似吳千語咁嫁個有米老公呢？而自我簡介寫道「熱愛生活熱愛學習，善良可親，有愛心，聰明幹練」，真係好正面。從呢2個帳戶嘅內容所見，疑似何太不時拍片講人生道理，當中更有教女仕們愛情同生活智慧，同樣不停爆金句，例如「不能談錢的戀愛就不要談」、「如果被一個富豪愛上了，你一定要嫁，而不是去嫁一個窮光蛋」、「不要跟比自己階層低的人談戀愛」等。疑似何太講過「不對的人千萬不要有肌膚之親」，咁何太同何伯瞬即撻著，似乎真係找對的人嘞。

有網民發現，疑似何太帳戶嘅拍片場景，同《東張》入面何太屋企陳設相當相似。而喺「人氣急升」後，何太喺《東張》為網民嘅負評而難過，但係疑似何太喺抖音帳戶同網民留言互動。最爆係有人問疑似何太「何伯係咪真係比我地啲後生勁？」，疑似何太大方答「係」，似乎啲靚湯真係越飲越精神！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！